اسلام آباد:سینیٹ نے گرفتار،نظربند اور زیرحراست افراد سے تفتیش سے متعلق بل اور فیٹل ایکسیڈنٹس ترمیمی بل2024ء سمیت تین بلوں کی متفقہ منظوری دے دی ۔ متعدد پرائیویٹ بل قائمہ کمیٹیوں کے سپرد کر دیے گئے۔
سینیٹ کا اجلاس چیئرمین یوسف رضا گیلانی کی زیرصدارت ہوا ۔ سینیٹر فاروق ایچ نائیک نے گرفتار،نظربند اور زیرحراست افراد سے تفتیش سے متعلق ترمیمی بل سینیٹ میں پیش کیا جسے متفقہ طور پر منظور کرلیا گیا۔
فاروق نائیک نے بتایا کہ بل کی رو سے گرفتار شخص کو گرفتاری کی تحریری وجوہات بتائی جائیں گی۔اس کو وکلاء کی مدد حاصل ہوگی ، اس کو فیملی سے ملاقات کی اجازت اور دوائیاں مل سکیں گی ۔قانون کی خلاف ورزی کرنے والے پولیس افسران کو جرمانہ ہوگا۔
سینیٹر شہادت اعوان کی جانب سے پیش کیا گیا فیٹل ایکسیڈنٹس (ترمیمی بل) بھی متفقہ طور پر منظورکرلیا گیا۔حادثات سے متعلق کیسز کا فیصلہ چھ ماہ میں کیا جائے گا۔سینیٹر شہادت اعوان کا پیش کردہ لمیٹڈلائیبلیٹی پارٹنرشپ ترمیمی بل بھی سینیٹ نے منظور کرلیاگیا۔
پاکستان سائیکالوجیکل کونسل بل،انسداد الیکٹرانک کرائمز ترمیمی بل،الیکٹرانک نیکوٹین ڈلیوری سسٹمز ریگولیشن بل ،یونیورسٹیوں میں مستحق افراد کیلئے خصوصی نشستیں مختص کرنے سمیت متعددبل متعلقہ قائمہ کمیٹیوں کے سپرد کر دیے گئے ۔
پاکستان اینیمل سائنس کونسل بل پارلیمنٹ کے مشترکہ اجلاس کو بھجوانے کی تحریک منظورکرلی گئی۔ طلحہ محمود کی بیروزگاری پر قابو پانے کی قراردادمتعلقہ قائمہ کمیٹی کے سپرد کردی گئی ۔
