کوئٹہ میں خودکش دھماکا، 5 افراد جاں بحق

کوئٹہ میں بھارتی پراکسی فتنہ الہندوستان کی جانب سے خودکش دھماکا کیا گیا ہے جس میں حملہ آور سمیت 5 دہشتگرد جہنم واصل ہوگئے، جبکہ واقعے میں 5 افراد جاں بحق اور 20 سے زائد شدید زخمی ہوئے ہیں۔
ذرائع کے مطابق زرغون روڈ پشین اسٹاپ کے قریب دھماکے کے بعد فائرنگ کی آوازیں بھی سنی گئیں۔
سیکیورٹی ذرائع کا کہنا ہے کہ کوئٹہ میں بھارتی پراکسی فتنہ الخوارج نے گاڑی کے ذریعے خودکش دھماکا کیا، حملہ آور دھماکے کے بعد ایف سی ہیڈکوارٹر میں داخل ہونے کی کوشش کر رہے تھے۔
ذرائع کے مطابق دھماکے میں خودکش حملہ آور کے علاوہ 5 دہشتگرد جہنم واصل ہوگئے۔ دھماکے میں ایف سی کے 2 جوان زخمی ہوئے۔
سیکیورٹی ذرائع کا کہنا ہے کہ حملہ آور ایف سی کی وردی میں ملبوس تھے، سب مارے گئے ہیں۔
وزیر صحت بخت محمد کاکڑ اور سیکریٹری مجیب الرحمٰن کی ہدایت پر ایمرجنسی نافذ کی گئی۔
ایم ایس سول اسپتال کوئٹہ ڈاکٹر عبدالہادی کے مطابق دھماکے میں 5 افراد جاں بحق اور 20 سے زائد زخمی ہوئے ہیں۔ جاں بحق اور زخمی ہونے والے عام شہری ہیں، زخمیوں کو طبی امداد فراہم کی جارہی ہے۔
ترجمان محکمہ صحت کے مطابق کوئٹہ میں دھماکے کے بعد اسپتالوں میں ایمرجنسی نافذ کردی گئی۔ ایمرجنسی سول اسپتال، بی ایم سی اسپتال اور ٹراما سینٹر میں نافذ کی گئی۔
انہوں نے کہا کہ تمام کنسلٹنٹس، ڈاکٹرز، فارماسسٹس، اسٹاف نرسز پیرامیڈیکل اسٹاف اسپتالوں میں طلب کیا۔