وزیراعلیٰ پنجاب مریم نواز نے سیلاب سے بچا ؤکے لیے آبی ذخائر کی تعمیر کا تفصیلی جائزہ لینے کی ہدایت جاری کردی۔وزیراعلیٰ نے واضح کیا کہ سیلاب کے خطرات پر قابو پانے کے لیے آبی ذخائر کی تعمیر پر فوری طور پر تفصیلی غور کیا جائے تاکہ آئندہ کسی بھی بڑے نقصان سے محفوظ رہا جا سکے۔
مریم نواز نے سرحدی علاقے تلوار پوسٹ اور شیخ پورہ نو میں قائم ریلیف کیمپ کا دورہ کیا۔ اس موقع پر انہوں نے علاقہ گٹی کلنجر سے کشتی کے ذریعے تلوار پوسٹ آنے والے متاثرہ خاندانوں کا استقبال کیا۔ انہوں نے ایک معصوم بچے کو گود میں اٹھایا اور بعدازاں ماں کے سپرد کردیا۔سیلاب میں گھرے نومولود بچے کو بحفاظت نکالنے پر وزیراعلیٰ مریم نواز نے ڈی ایس پی نعمان کو انعام دیا، جبکہ ریسکیو ٹیم کی کاوشوں کو سراہتے ہوئے 10لاکھ روپے کے خصوصی انعام کا اعلان بھی کیا۔
دورے کے دوران وزیراعلیٰ نے تلوار پوسٹ پر قائم لائیو اسٹاک، ہیلتھ، ریسکیو، پولیس اور دیگر محکموں کے کیمپوں کا معائنہ کیا۔اس کے بعد مریم نواز نے قصور میں قائم فلڈ ریلیف کیمپ کا بھی دورہ کیا۔ انہوں نے متاثرین سے ملاقات کر کے ان کے مسائل دریافت کیے اور ان سے گفتگو کی۔وزیراعلیٰ نے عارضی اسپتال میں مریضوں کی عیادت بھی کی اور انتظامیہ سے فلڈ ریلیف کیمپ سے متعلق بریفنگ لی۔
