پاکستان تحریک انصاف کے 18 ارکان قومی اسمبلی نے قائمہ کمیٹیوں سے استعفا دے دیا۔چیئرمین پی ٹی آئی بیرسٹر گوہر نے 18 ارکان کے استعفے اسپیکر قومی اسمبلی کو جمع کروادیے جن میں بیرسٹر گوہر، جنید اکبر، شہریار آفریدی، عامر ڈوگر شامل ہیں۔امجد علی خان، شہزادہ گشتاسپ، علی خان جدون بھی مستعفی ہونے والے افراد میں شامل ہیں۔
صاحبزادہ صبغت اللہ، محبوب شاہ، مجاہد علی، انور تاج، فضل محمد خان، ساجد خان، ارباب عامر، آصف خان، ارشد ساہی، شبیر قریشی، اویسی جھکڑ بھی مستعفی ہوگئے۔بیرسٹر گوہر کا کہنا تھا کہ بات یہاں تک پہنچ چکی ہے اب دیکھتے ہیں آگے کیسے چلتے ہیں، ہم نے بڑی کوشش کی کہ سسٹم کا حصہ رہیں۔ ہم 91 نشستوں کیساتھ اسمبلی میں بیٹھے ہیں، بانی پی ٹی آئی نے کہا بات کرو آگے بڑھو۔
ان کا کہنا تھا کہ ابھی بھی کچھ نہیں ہورہا، کہیں کوئی مذاکرات نہیں ہورہے، سیاست ہے اب دیکھتے ہیں آگے کیسے بڑھنا ہے۔رہنما تحریک انصاف شہریار آفریدی کا کہنا تھا کہ قائد کے حکم پر دونوں قائمہ کمیٹیوں سے استعفیٰ دیا ہے۔چیئرمین پی ٹی آئی بیرسٹر گوہر نے چار قائمہ کمیٹیوں سے استعفیٰ د دیا۔
نجی ٹی وی کے مطابق بیرسٹر گوہر نے اپنا استعفا اسپیکر قومی اسمبلی کے آفس میں جمع کرایا ہے۔بیرسٹر گوہر نے قانون و انصاف، انسانی حقوق، آئی ٹی اور ہاؤس بزنس ایڈوائزری سے استعفا دیا۔
