الیکشن کمیشن کی سیاسی جماعتوں کو مالی گوشوارے جمع کرانے کی آخری مہلت

اسلام آباد : الیکشن کمیشن آف پاکستان نے ملک کی تمام سیاسی جماعتوں کے سربراہان کو مالی گوشوارے 29 اگست 2025 تک الیکشن کمیشن میں جمع کرانے کی ہدایت کی ہے۔
ترجمان الیکشن کمیشن کے مطابق الیکشن ایکٹ کی دفعہ 210 کے مطابق، ہر سیاسی جماعت اس امر کی قانونی طور پر مکلف ہے کہ مالی سال کے اختتام کے چالیس روز کے اندر اپنے مالیاتی گوشوارے الیکشن کمیشن کو فراہم کرے، جن میں جماعت کی سالانہ آمدنی و اخراجات، ذرائع آمدن و فنڈنگ، نیز اثاثہ جات و واجبات کی وضاحت شامل ہو۔ ان گوشواروں پر جماعت کے مجاز عہدیدار کے دستخط ہونا ناگزیر ہیں، جو اس امر کی باقاعدہ تصدیق کرے کہ جماعت نے کسی ممنوعہ یا غیر مجاز ذریعے سے کوئی مالی معاونت حاصل نہیں کی، اور یہ کہ پیش کردہ مالی معلومات جماعت کی حقیقی مالی حالت کی عکاس ہیں۔
مزید برآں، تمام گوشوارے چارٹرڈ اکاؤنٹنٹ کی جانب سے آڈٹ شدہ ہونے چاہئیں، اور ان کے ساتھ انسٹیٹیوٹ آف چارٹرڈ اکاؤنٹنٹس آف پاکستان (آئی کیپ)کی جاری کردہ تازہ ترین تجدیدی سند بھی منسلک ہونی چاہیے۔ ترجمان کے مطابق فارم ڈی الیکشن کمیشن کے مرکزی سیکریٹریٹ اسلام آباد، اور چاروں صوبوں میں قائم صوبائی الیکشن کمیشن کے دفاتر سے بلا معاوضہ دستیاب ہے، جب کہ یہ فارم کمیشن کی سرکاری ویب سائٹ پر بھی فراہم کیا گیا ہے۔
الیکشن کمیشن نے واضح کیا ہے کہ فارم میں کسی قسم کی قطع و برید یا اوور رائٹنگ ناقابل قبول ہو گی، اور ہر سیاسی جماعت پر لازم ہے کہ وہ فارم کے ساتھ 1 جولائی 2024 سے 30 جون 2025 تک کی مدت کے دوران تمام بینک اکانٹس کی تفصیلی بینک اسٹیٹمنٹس بھی منسلک کرے کمیشن کے مطابق تمام مالیاتی گوشوارے براہِ راست مجاز جماعتی نمائندے کے ذریعے، سیکرٹری الیکشن کمیشن آف پاکستان، شاہرہ دستور، سیکٹر G-5/2، اسلام آباد کے دفتر میں پہنچانا لازم ہوں گے۔ کسی بھی قسم کی دستاویزات بذریعہ ڈاک، فیکس، کوریئر یا دیگر غیر روایتی ذرائع سے موصول ہونے کی صورت میں انہیں مسترد کر دیا جائے گا، جیسا کہ الیکشن رولز 2017 کے قاعدہ 156 میں صراحت سے بیان کیا گیا ہے۔ معلومات یا وضاحت کے حصول کے لیے الیکشن کمیشن سے فون نمبر (+92)(51) 9205611 پر رابطہ کیا جا سکتا ہے۔