سول آرمڈ فورسز نے فوج کی طرح خصوصی الائونس کا مطالبہ کردیا

اسلام آباد : سول آرمڈ فورسز نے بجٹ میں فوج کے لیے 50 اور 20 فیصد اعلان کردہ خصوصی الاؤنس مانگ لیا۔
ذرائع کا کہنا ہے کہ سول آرمڈ فورسز نے فوج کی طرح خصوصی الاؤنس کی منظوری کے لیے وزارت داخلہ کو درخواست کردی ہے۔ درخواست میں کہا گیاہے کہ سول آرمڈ فورسز اہلکار سرحدوں کی حفاظت، اندرونی سلامتی اور پاک فوج کے شانہ بشانہ آپریشنز میں خدمات انجام دے رہے ہیں ، لہٰذا خصوصی الائونس تمام محکموں کے افسران، عہدیداران اور ان کے مساوی اہلکاروں کیلئے بھی منظور کیاجائے۔
حکومتی ذرائع کے مطابق سندھ رینجرز ،پنجاب رینجرز،گلگت بلتستان اسکاؤٹس، ایف سی ساؤتھ، ایف سی نارتھ خیبر پختونخوا اورایف سی نارتھ بلوچستان نے خصوصی الاؤنس کی فراہمی کے لیے درخواست کی ہے۔