انسداد دہشت گردی عدالت فیصل آباد نے 9 مئی کو رانا ثناء اللہ کے گھر پر حملے کے کیس کا فیصلہ سناتے ہوئے 59 ملزمان کو 10، 10 سال قید کی سزا سنادی۔عدالت نے قومی اسمبلی اور سینیٹ میں سابق اپوزیشن لیڈر عمر ایوب اور شبلی فراز کے علاوہ سابق وفاقی وزیر زرتاج گل،رائے حسن نواز، احمد چٹھہ ، شیخ راشد شفیق،رائے مرتضیٰ اقبال کو دس دس سال قید کی سزا سنائی گئی،فرح آغا اور کنول شوزب کو بھی 10،10سا ل قید کی سزا سنائی گئی۔
سابق وفاقی وزیر فواد چوہدری اور پی ٹی آئی کے وائس چیئرمین شاہ محمود قریشی کے صاحبزادے زین قریشی کو بری کردیا۔ 9 مئی کو فیصل آباد میں وزیراعظم کے مشیر رانا ثنااللہ کے گھر پر حملے کے کیس کی سماعت انسداد دہشت گردی عدالت میں ہوئی۔انسداد دہشت گردی عدالت نے مجموعی طور پر 59 پی ٹی آئی رہنماؤں وکارکنانوں کو 10،10 سال قید کی سزا سنادی، ان کے علاوہ 16 ملزمان کو تین تین سال قید کی سزا سنائی گئی۔
پس منظر یاد رہے کہ 9 مئی 2023 کو القادر ٹرسٹ کیس میں عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا۔اس دوران لاہور کے علاقے ماڈل ٹاؤن میں 9 مئی کو مسلم لیگ (ن) کے دفتر کو جلانے کے علاوہ فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا جب کہ اس دوران کم از کم 8 افراد ہلاک اور 290 زخمی ہوئے تھے۔
قانون نافذ کرنے والے اداروں کے ساتھ لڑائی، توڑ پھوڑ اور جلاؤ گھیراؤ میں ملوث 1900 افراد کو گرفتار کر لیا گیا تھا جب کہ عمران خان اور ان کی پارٹی رہنماؤ ں اور کارکنان کے خلاف مقدمات بھی درج کیے گئے تھے۔
