قصور: دریائے ستلج میں پانی کا بہاؤ تیز، درجنوں دیہات متاثر، بارشوں کا نیا الرٹ جاری

لاہور (مانیٹرنگ ڈیسک) پنجاب کے علاقے قصور میں دریائے ستلج میں اونچے درجے کے سیلاب برقرار ہے جس کے باعث دریا کی بھپری موجوں نے 30 سے زاید دیہات کو متاثر کردیا ہے۔
ذرائع کے مطابق ہیڈ گنڈاسنگھ والا کے مقام پر پانی کی سطح 21.30 فٹ ریکارڈ کی گئی ہے۔ترجمان پروونشیل ڈیزاسٹر مینجمٹ اتھارٹی (پی ڈی ایم اے) کے مطابق دریائے ستلج میں گنڈا سنگھ والا کے مقام پر اونچے درجے کا سیلاب ہے اور پانی کا بہاؤ 1 لاکھ 29 ہزار کیوسک ہے، جبکہ ہیڈ سلیمانکی کے مقام پر نچلے درجے کا سیلاب اور پانی کا بہاؤ 63 ہزار کیوسک ہے۔ اونچے درجے کے سیلاب سے 72 دیہات متاثر ہونے کا خدشہ ہے۔
پی ڈی ایم اے کے مطابق دریائے سندھ میں تربیلا کے مقام پر نچلے درجے کا سیلاب اور پانی کا بہاؤ 2 لاکھ 55 ہزار کیوسک ہے۔ تونسہ، کالا باغ اور چشمہ کے مقام پر پانی کا بہاؤ نارمل ہے۔ترجمان نے بتایا کہ شاہدرہ کے مقام پر پانی کا بہاؤ چودہ ہزار کیوسک اور بہاؤ نارمل ہے۔ بسنتر نالہ اور پلکھو میں نچلے درجے کی سیلابی صورتحال ہے۔
ڈی جی پی ڈی ایم اے کا کہنا ہے کہ دریائے ستلج میں بھارت کی جانب سے مزید پانی چھوڑے جانے کا خدشہ ہے۔ دریاؤں کے گرد موجود شہریوں کو فوری محفوظ مقامات پر منتقل ہونے کی ہدایات دے دی گئی ہیں۔پی ڈی ایم اے پنجاب کے مطابق آج سے صوبے کے بیشتر اضلاع میں مون سون بارشوں کی پیشگوئی ہے۔ مون سون بارشوں کا 8 واں اسپیل 27 اگست تک جاری رہے گا۔
ڈی جی پی ڈی ایم اے نے کہا ہے کہ صوبے بھر کی انتظامیہ کو الرٹ جاری کر دیا ہے، ہنگامی صورتحال سے نمٹنے کے لیے متعلقہ محکمے الرٹ ہیں۔ ملک کے بالائی اور وسطی علاقوں میں آج سے بارش کا نیا سسٹم برسنے کو تیار ہے۔ مغربی ہواؤں کا نیا سلسلہ بالائی علاقوں میں داخل ہوگیا ہے۔
ذرائع کے مطابق نیشنل ڈیزاسٹر مینجمنٹ اتھارٹی (این ڈی ایم اے) نے آج سے تیس اگست تک ملک بھر میں بارشوں کا نیا الرٹ جاری کردیا ہے۔پاکستان میں تین بارشوں کے اسپیل داخل ہو رہے ہیں۔ ملک کے بیشتر علاقوں میں شدید بارشوں کا امکان ہے جس کے باعث اربن فلڈنگ، ندی نالوں میں طغیانی، پہاڑی علاقوں میں لینڈ سلائیڈنگ کا خدشہ ہے۔
این ڈی ایم اے کے مطابق آج سے 27 اگست تک مظفرآباد سمیت آزاد کشمیر کے کئی علاقوں میں موسلا دھار بارش متوقع ہے۔گلگت بلتستان، خیبرپختونخوا، اسلام آباد، راولپنڈی، لاہور سمیت پنجاب کے مختلف شہر بھی موسلا دھار بارش کی لپیٹ میں آئیں گے۔کراچی، ٹھٹہ، سجاول، بدین اور تھرپارکر ، حیدرآباد ، جامشورو ، نوابشاہ ، دادو ، خیرپور، سکھر، گھوٹکی، لاڑکانہ، جیکب آباد، شکار پور، کشمور اور شہید بینظیرآباد میں بارشیں متوقع ہیں۔