کراچی:پاکستان میں جدید بینکاری کے نئے دور کا آغاز ہوگیا، سٹیٹ بینک نے ادائیگیوں کے نیا نظام پرزم پلس متعارف کرادیا۔
گورنر سٹیٹ بینک جمیل احمد نے کراچی میں تقریب کے د وران ادائیگی کا نیا نظام پرزم پلس متعارف کرادیا۔ تقریب میں سٹیٹ بینک کے اعلی عہدیداران سمیت بینکنگ انڈسٹری کی چیدہ شخصیات عالمی مالیاتی اداروں کے نمائندوں نے شرکت کی۔
گورنر سٹیٹ بینک نے کہاکہ پاکستان میں ریئل ٹائم انٹربینک پیمنٹ سیٹلمنٹ سسٹم کے نئے ورژن پرزم پلس کے آغاز سے ملک میں ڈیجیٹل ٹرانسفارمیشن کا نیا باب کھل گیا۔انہوں نے کہا کہ پرانے نظام کے تحت گزشتہ برس ایک ہزار 43 کھرب روپے مالیت کی ٹرانزیکشنز پروسیس کی گئیں جو ملکی جی ڈی پی سے 10 گنا زیادہ ہیں، ان میں سب سے زیادہ حصہ 730 کھرب روپے مالیت کی حکومتی سیکورٹیز کے لین دین کا تھا جبکہ حجم کے اعتبار سے 91 فیصد ٹرانزیکشنز تیسرے فریق کے کسٹمر ٹرانسفرز پر مشتمل تھیں۔
انہوں نے کہا کہ موبائل بینکنگ ایپس کے 2 کروڑ 80 لاکھ، برانچ لیس بینکنگ کے 7 کروڑ 10 لاکھ اور انٹرنیٹ بینکنگ کے ایک کروڑ 70 لاکھ صارفین اس ڈیجیٹل تبدیلی کا ثبوت ہیں۔
گورنر سٹیٹ بینک نے مزید کہا کہ پرزم پلس جدید عالمی معیار آئی ایس او 20022 پر مبنی ہے جو مالیاتی لین دین میں شفافیت، سیکورٹی اور باہمی ربط کو مزید مضبوط کرے گا، اس نظام میں لیکویڈیٹی مینجمنٹ ٹولز، مستقبل کی ادائیگیوں کی شیڈولنگ اور مرکزی سیکورٹیز ڈپازٹری کے ساتھ مربوط فیچرز شامل ہیںجو نیلامیوں، کولیٹرل مینجمنٹ اور اوپن مارکیٹ آپریشنز کو مزید سہل بنائیں گے۔
