بھارت کی جانب سے دریائے ستلج میں پانی چھوڑنے سے ضلع بہاولنگر میں نچلے درجے کے سیلاب کے باعث دریائی بیلٹ میں فصلیں، ڈیرے زیرآب آگئے۔ گنڈا سنگھ والا کے مقام پر پانی کا اخراج 70 ہزار کیوسک تک پہنچ گیا۔سیلابی ریلے سے قصور کی سیکڑوں ایکڑ فصلیں زیرِ آب آگئیں جبکہ درجنوں آبادیاں متاثر ہوئیں اور مقامی آبادی کی نقل مکانی جاری ہے۔
ضلعی انتظامیہ نے دفعہ ایک سو چوالیس نافذ کرکے وارننگ جاری کردی ہے اور دریائی بیلٹ سے لوگوں کو فوری انخلاء کی ہدایت کی گئی ہے۔ریسکیو 1122 نے متاثرہ علاقوں میں بوٹ سروس شروع کر دی ہے، جبکہ متاثرہ خاندانوں کو دو وقت کا کھانا اور مویشیوں کے لیے چارہ فراہم کیا جا رہا ہے۔ضلعی انتظامیہ اور پی ڈی ایم اے ہنگامی صورتحال سے نمٹنے کے لیے الرٹ ہیں۔
ڈپٹی کمشنر قصور کے مطابق متاثرین کی ہر ممکن مدد اور حفاظتی اقدامات کیے جا رہے ہیں۔تلوار پوسٹ پر ریسکیو، پولیس، ریونیو اور محکمہ انہار کے کیمپ بھی قائم کر دیے گئے ہیں تاکہ امدادی سرگرمیوں کو مؤثر بنایا جا سکے۔
