پشاور:وزیراعلی خیبر پختونخوا علی امین گنڈاپور کا کہنا ہے پاکستان تحریک انصاف کے خلاف انتقامی کارروائیاں عروج پر ہیں لیکن ہم ڈٹ کر کھڑے ہیں اور پاکستان اور آزادی کی جنگ آخری دم تک لڑیں گے۔
وزیر اعلیٰ علی امین گنڈاپور نے اپنے بیان میں کہا کہ پاکستان میں آئین و قانون نام کی کوئی چیز باقی نہیں رہی، عوامی نمائندوں کو بلاوجہ نا اہل کرکے ان کے حقوق چھینے جا رہے ہیں۔ان کا کہناتھا کہ الیکشن کے دوران ملک بھر میں ہم سے مینڈیٹ چوری کیا گیا، فارم 47 کی مانگے تانگے کی حکومت ہم پر مسلط کی گئی۔
انہوں نے کہا کہ سابق حکومتوں کی کرپشن کو ہمارے خلاف ہتھیار بنایا جا رہا ہے، کوہستان اسکینڈل صوبے کا نہیں بلکہ وفاق کا معاملہ ہے مگر الزام ہم پر ڈالا جا رہا ہے۔وزیر اعلیٰ خیبر پختونخوا کا کہنا تھا کہ ہمیں قرضوں میں ڈوبا ہوا اور تنخواہوں کے لالے پڑے صوبے کا چارج ملا، صوبے کو مالی تباہی سے نکال کر کامیابی کی طرف گامزن کر دیا ہے۔
علی امین گنڈا پور نے دعویٰ کیا کہ17ماہ میں صوبے نے250ارب روپے سے زیادہ آمدنی حاصل کرکے تاریخ رقم کی ہے، قرضوں کی ادائیگی کے لیے190ارب روپے کا انڈوومنٹ فنڈ قائم کیا اور ہدف300ارب روپے ہے، کے پی شفافیت، خدمت اور ترقی میں ملک بھر میں مثال بن چکا ہے۔
انہوں نے کہا کہ دہشت گردی کا خاتمہ اور عوام کا اعتماد بحال کرنا سب سے بڑی ترجیح ہے، جرگوں کا دائرہ مزید وسیع کیا جائے گا، عوام کی رائے فیصلہ کن ہو گی۔وزیر اعلیٰ کے پی نے کہا کہ پولیس اور فوج کے شہدا کا خون رائیگاں نہیں جائے گا، عوامی رائے اور جرگوں کی مشاورت سے مضبوط حکمت عملی تیار کریں گے۔
ان کا کہنا تھاکہ رجیم چینج سے حکومت گرانے کے بعد پی ٹی آئی حالتِ جنگ میں ہے، ریاست مخالف قوتیں متحرک لیکن ہم ڈٹ کر مقابلہ کر رہے ہیں، انتقامی کارروائیاں عروج پر ہونے کے باوجود ہم پیچھے نہیں ہٹیں گے، یہ پاکستان اور آزادی کی جنگ آخری دم تک لڑیں گے۔
