مذاکرات کی حکومتی دعوت، پی ٹی آئی نے جواب دے دیا

اسلام آباد:وفاقی وزیر قانون اعظم نذیر تارڑ نے اپوزیشن کو ایک بار پھر مذاکرات کی دعوت دیتے ہوئے پاکستان تحریک انصاف کو نااہلی کے خلاف عدالتوں سے رجوع کرنے کا مشورہ دے دیا۔
قومی اسمبلی میں خطاب کرتے ہوئے وفاقی وزیر قانون نے کہا کہ اسمبلی چلانے، ماحول بہتر بنانے اور قانون سازی کے لیے اپوزیشن ہمارے ساتھ مل کر بیٹھے، اس سے عام آدمی اور سیاست دان، دونوں کا فائدہ ہوگا۔
اعظم نذیر تارڑ نے کہا کہ اس حوالے سے وزیراعظم کی ہدایات بھی ہیں، انہوں نے ایک بار پھر اپوزیشن کو مذاکرات کی دعوت دی۔
قبل ازیں اپنے خطاب میں چیئرمین پاکستان تحریک انصاف بیرسٹر گوہر نے کہا کہ پاکستان کے چاروں صوبوں اور اسلام آباد میں لوگوں نے بانی پی ٹی آئی عمران خان کے حق میں بھرپور احتجاج کیا، حکومت کا رویہ دن بدن غیر جمہوری ہوتا جارہا ہے۔
ان کا کہنا تھا کہ ہمارے بزرگ سیاستدانوں کو جیل میں ڈال دیا گیا، پی ٹی آئی نے الیکشن میں 180 نشستیں جیتی تھیں۔ ہمیں صرف 90 کے قریب نشستیں دی گئیں، اپوزیشن لیڈر قومی اسمبلی عمر ایوب، زرتاج گل اور جمشید دستی سمیت دیگر رہنماؤں کو نااہل کیا گیا، ہمارے اراکین کی نااہلی خلاف قانون اور خلاف آئین ہے۔
چیئرمین پی ٹی آئی نے کہا کہ الیکشن کمیشن کے پاس آئین کے مطابق اس طرح نااہلی کا اختیار نہیں، اس عمل میں آئین قانون اور سپریم کورٹ کے فیصلے کو بالائے طاق رکھا گیا۔
بیرسٹر گوہر نے کہا کہ پاکستان تحریک انصاف کو دیوار سے لگایا گیا، ہماری آواز کو ہر جگہ دبایا گیا۔
انہوں نے واضح کیا کہ ہم نے 9 مئی کی ہمیشہ مذمت کی ہے، ہم چاہتے ہیں کہ ملک میں جمہوریت رواں دواں ہو لیکن انتقامی کارروائیاں عروج پر ہیں۔ ہمارے ساتھ رویہ روز بروز خراب ہوتا جارہا ہے، استدعا ہے جمہوریت کو خطرے میں نہ ڈالیں۔