قلات/اسلام آباد/کراچی:قلات میں کراچی سے کوئٹہ جانیوالی مسافر کوچ پر دستی بم حملہ اور فائرنگ،3 مسافر جاں بحق ، 12 زخمی ہوگئے۔
پولیس حکام کے مطابق مقامی ٹرانسپورٹ کمپنی کی مسافر کوچ کراچی سے کوئٹہ آرہی تھی جب یہ قلات کے علاقے نیمرغ کراس کے قریب پہنچی تو قریبی پہاڑوں پر چھپے مسلح افرادنے کوچ کو روکنے کی کوشش کی۔
ڈرائیورکے کوچ نہ روکنے پر مسلح افراد نے فائرنگ کے ساتھ دستی بم بھی پھینکے۔پولیس کا کہنا ہے کہ لاشوں اور زخمیوں کو ڈی ایچ کیو اسپتال منتقل کر دیا گیاہے۔پولیس کا کہناتھا کہ زخمیوں میں دو مسافروں کی حالت تشویشناک ہے۔
ادھرترجمان بلوچستان حکومت شاہد رند کا کہناتھا کہ مسافر کوچ پر فائرنگ سے 3 مسافر شہید اور 7 زخمی ہوگئے، سیکورٹی ادارے، ضلعی انتظامیہ اور ریسکیو ٹیمیں فوری طور پر موقع پر پہنچیں۔واقعے کے بعد پولیس اور ایف سی نے ملزمان کی تلاش کیلئے علاقے میں سرچ آپریشن شروع کردیاہے۔
ترجمان حکومت بلوچستان شاہد رند نے بتایا کہ وزیر اعلیٰ بلوچستان میر سرفراز بگٹی نے آئی جی پولیس اور ایڈیشنل سیکرٹری داخلہ سے واقعے کی رپورٹ طلب کرلی ہے۔
ادھرصدرِ مملکت آصف علی زرداری نے قلات میں مسافر بس پر بزدلانہ دہشتگرد حملے کی شدید مذمت کرتے ہوئے قیمتی جانوں کے ضیاع پر دکھ اور افسوس کا اظہار کیا ہے۔صدر مملکت نے کہا کہ بے گناہ عام شہریوں کو نشانہ بنانا انتہائی سفاکانہ اور قابل مذمت فعل ہے، دہشتگرد امن و استحکام کو سبوتاژ کرنا چاہتے ہیں، یہ انسانیت اور امن کے دشمن ہیں۔
انہوں نے کہا کہ قوم کی حمایت سے دہشتگردی کے ناسور کا مکمل خاتمہ کریں گے اور ریاست دہشتگردی کے خلاف پوری قوت سے کارروائی جاری رکھے گی۔صدر مملکت نے زخمیوں کو فوری اور بہترین طبی سہولیات کی فراہمی یقینی بنانے کی ہدایت کرتے ہوئے جاں بحق افراد کے لواحقین کے ساتھ اظہار تعزیت کیا۔
وزیراعظم محمد شہباز شریف نے بھی مسافر بس پر فتنہ الہندوستان کے دہشتگردوں کی فائرنگ کے نتیجے میں معصوم شہریوں کی شہادت پر اظہار افسوس کیا اور شہداء کے لیے دعائے مغفرت اور لواحقین کے لیے صبر و استقامت کی دعا کی۔
وزیراعظم نے زخمیوں کو فوری طبی امداد فراہم کرنے کی ہدایت کی اور کہا کہ معصوم اور نہتے شہریوں کی جان و مال کو نقصان پہنچانے والے دہشتگردوں کو بہت سخت قیمت ادا کرنی پڑے گی۔شہباز شریف نے کہا کہ حکومت اور سیکورٹی فورسز ملک سے دہشتگردی کے مکمل خاتمے کے لیے پر عزم ہیں۔
وفاقی وزیرداخلہ محسن نقوی نے حملے کی مذمت اور واقعے میں 3 مسافروں کے جاں بحق ہونے کے واقعے پر افسوس کا اظہار کیا۔وفاقی وزیرداخلہ محسن نقوی نے جاں بحق مسافروں کے لواحقین سے دلی ہمدردی و اظہار تعزیت کیا اور زخمی مسافروں کی جلد صحتیابی کیلئے دعا کی۔
محسن نقوی نے کہا کہ فتنہ الہندوستان کے دہشتگردوں کا بے گناہ اور معصوم مسافروں کو نشانہ بنانا انتہائی بزدلانہ فعل ہے، فتنہ الہندوستان کے دہشتگرد سافٹ ٹارگٹ کو نشانہ بنا کر امن کو سبوتاژ کرنے کی گھناؤنی سازش کر رہے ہیں۔
انہوں نے کہا کہ قوم کی حمایت سے بھارتی اسپانسرڈ دہشتگردوں کی ہر سازش کو ناکام بنائیں گے جبکہ وزیراعلیٰ بلوچستان ووسندھ نے بھی واقعے کی شدید الفاظ میں مذمت کرتے ہوئے اسے بربریت قرار دیا۔ انہوں نے کہا کہ معصوم مسافروں کو نشانہ بنانا انتہائی وحشیانہ عمل ہے، یہ دہشتگرد پاک سرزمین کے لیے ناسورہیں جن کا خاتمہ بہت ضروری ہوگیا ہے۔
