وزیراعلیٰ خیبرپختونخوا علی امین گنڈاپور کے مولانا فضل الرحمان سے متعلق حالیہ بیان پر جمعیت علمائے اسلام کے مرکزی رہنما حافظ حمداللہ کا شدید ردعمل آگیا۔اپنے بیان میں حافظ حمد اللہ کا کہنا تھا کہ مولانا فضل الرحمن کو فارم 47 کا بینفشری کہنے والا گنڈاپور بتائے تم کس کے این او سی پر خیبر پختونخوا کے وزیراعلیٰ بنیں؟ تم خود نہ تین میں ہوں نہ تیرہ میں، یہ ہے آپ کی حیثیت۔
انہوں نے کہا کہ پورا صوبہ جل رہا ہے، کے پی کے عوام امن کے لئے ترس رہے ہیں، جبکہ تم لاؤ لشکر سمیت پنجاب فتح کرنے نکلے مگر لاہور میں بھڑکے مارتے رہے، آج بھی آپ کی حکومت دولت اور طاقت کے بل پر کھڑی ہے۔ان کا کہنا تھا کہ آپ کی اپنی پارٹی میں آپ کی حکومت کے خلاف آوازیں اٹھ رہی ہے، آئے روز خیبرپختونخوا کے عوام اپنے پیاروں کی لاشیں اٹھا رہے ہیں اور تم کو گیارہ کروڑ بسکٹ کھانے سے فرصت نہیں ہے۔8 فروری کے انتخابات میں تمہیں ووٹ سے نہیں بلکہ نوٹ سے جتوایا گیا۔
یاد رہے کہ علی امین گنڈاپور نے گزشتہ روز لاہور میں پارٹی رہنماؤں سے خطاب کے دوران جے یو آئی کے سربراہ مولانا فضل الرحمان کو تنقید کا نشانہ بناتے ہوئے کہا تھا کہ مولانا فضل الرحمان کے پی میں تبدیلی لانے کے بجائے اپنے اندر تبدیلی لے آئیں، ان کے پاس مینڈیٹ جعلی ہے اور وہ فارم 47 کے بینفشری ہیں۔
