راولپنڈی:فیلڈ مارشل سید عاصم منیر کی زیر صدارت کور کمانڈرز کانفرنس میں اس عزم کا اظہار کیا گیا کہ پاکستانی عوام کی سلامتی اور تحفظ پاک افواج کی اولین ترجیح ہے اور شہدا کا خون رائیگاں نہیں جائے گا۔
بھارتی سرپرستی اور حمایت یافتہ نیٹ ورکس کے خلاف ہر سطح پر فیصلہ کن اور ہمہ گیر اقدامات ناگزیر ہیں، بھارت کی طرف سے دوطرفہ فوجی کشیدگی میں کسی تیسرے فریق کو شامل کرنا بھارت کی بلاک پولیٹکس کو فروغ دینے کی بے بنیاد کوشش ہے۔
پاک فوج کے شعبہ تعلقات عامہ ( آئی ایس پی آر) کے مطابق فیلڈ مارشل سید عاصم منیر نشان امتیاز (ملٹری) کی زیر صدارت کور کمانڈرز کانفرنس راولپنڈی میں جنرل ہیڈ کوارٹرز میں منعقد ہوئی، فورم نے بھارتی اسپانسرڈ پراکسیز کی جانب سے حالیہ دہشت گرد حملوں میں شہید ہونے والے سیکورٹی اہلکاروں کے ایصالِ ثواب کے لیے فاتحہ خوانی کی۔
کانفرنس میں دہشت گردوں کے خلاف حالیہ آپریشنز اور سیکورٹی فورسز کی کامیابیوں کا تفصیلی جائزہ لیا گیا۔فورم نے اس عزم کا اعادہ کیا کہ ہمارے شہداء کا خون رائیگاں نہیں جائے گا، پاکستان کے عوام کا تحفظ اور سلامتی مسلح افواج کی اولین ترجیح ہے۔
فورم نے اس بات پر زور دیا کہ بھارتی حمایت یافتہ اور اسپانسرڈ پراکسیز کے خلاف فیصلہ کن اور جامع کارروائیاں ہر سطح پر جاری رکھنا ناگزیر ہے، پہلگام واقعے میں واضح شکست کے بعد بھارت اب فتنہ الخوارج اور فتنہ الہندوستان کی پراکسیز کے ذریعے اپنے مذموم ایجنڈے کو مزید آگے بڑھانے کی کوشش کر رہا ہے۔
فیلڈ مارشل سید عاصم منیر نے وزیراعظم کے ہمراہ ایران، ترکیہ ، آذربائیجان، سعودی عرب اور متحدہ عرب امارات کے حالیہ کامیاب دوروں پر پاکستان کے فعال سفارتی کردار کی تفصیلات سے فورم کو آگاہ کیا۔فورم کو آرمی چیف کے تاریخی اور منفرد دورہ امریکا کے بارے میں بھی بریفنگ دی گئی۔
دورہ امریکا کے دوران اعلیٰ سطح کی امریکی قیادت کو پاکستان کا دو طرفہ معاملات، علاقائی اور بین الاقوامی امور پر بامقصد مؤقف براہِ راست پیش کیا گیا۔
فورم نے مشرق وسطیٰ اور ایران کی حالیہ پیش رفت کے تناظر میں داخلی و خارجی سلامتی پر بھی غور کیا اور عالمی سطح پر طاقت کے استعمال کو ترجیحی پالیسی ٹول کے طور پر اپنانے پر تشویش ظاہر کی جبکہ اس بدلتے عالمی رجحان کے تناظر میں فورم نے قومی خود انحصاری، اتحاد اور اجتماعی عزم کو ناگزیر قرار دیا۔
فیلڈ مارشل عاصم منیر کا کہنا تھا کہ بھارت کی جانب سے دوطرفہ فوجی کشیدگی میں کسی تیسرے فریق کو شامل کرنا بھارت کی بلاک پولیٹکس کو فروغ دینے کی بھونڈی کوشش ہے، اس بھونڈی کوشش کا مقصد بھارت کا خطے میں نیٹ سیکورٹی پرووائڈر کے خود ساختہ کردار کو گمراہ کن طور پر پیش کرنا ہے۔
عاصم منیر نے مزید کہا کہ درحقیقت عالمی برادری واضح طور پر بھارت کے توسیع پسندانہ عزائم اور ہندو توا انتہاپسندی کے خطرناک رجحانات سے بدظن ہوتی جارہی ہے۔فورم کو جنگ کی بدلتی ہوئی نوعیت اور ابھرتے ہوئے خطرات کے پیش نظر پاک فوج کی حکمت عملی اور جدتوں کے بارے میں بریف کیا گیا۔
فیلڈ مارشل نے ٹرائی سروسز ہم آہنگی کو مزید مضبوط کرنے میں پاک بحریہ اور پاک فضائیہ کی قیادت کو بھی سراہا۔کانفرنس کے اختتام پر فیلڈ مارشل عاصم منیر نے ملک کو درپیش تمام خطرات کے خلاف پاک فوج کی آپریشنل تیاریوں پر مکمل اعتماد کا اظہار کیا۔
