لاہور:نائب وزیر اعظم اور وزیر خارجہ سینیٹر اسحاق ڈار نے کہا ہے کہ بھارت نے جنگ شروع کی تو اس کے 6 طیارے مار گرائے اور اسے سبق سکھادیا، اسرائیل کی دہشت گردی کے خلاف ایران کی سفارتی طور پر مدد کی۔
لاہور میں میڈیا سے گفتگو کرتے ہوئے انہوں نے کہا کہ بھارت نے جنگ شروع کی تو اس کے 6 طیارے گرائے، چھتیس گھنٹے میں اسی ڈرون بھیجے تو پاکستان نے انہیں سبق سکھایا، پاکستان کو بہت عزت و احترام اور کامیابی ملی۔
نائب وزیر اعظم نے کہا کہ تاریخ میں کبھی کبھی مقام آتا ہے 2 سال کیلئے اقوام متحدہ کے سلامتی کونسل کے رکن منتخب ہو چکے ہیں، ایران پر مشکلات آئیں تو اسرائیل کی دہشت گردی کے خلاف اس کی سفارتی طور پر مدد کی،ایران نے تسلیم کرلیا سچا دوست پاکستان ہے، پارلیمنٹ میں بھی تشکر پاکستان کے نعرے لگائے، شہدا کے جنازوں میں پاکستان کے پرچم لہرائے گئے۔
اسحاق ڈار نے کہا کہ اسرائیل کی دہشت گردی کے نتیجے میں آرمی چیف کے جنازے میں بھی پاکستان کے حق میں نعرے لگتے رہے، جنگ لڑنے کی خواہش و ایجنڈا نہیں، امن اور خطے کی سلامتی چاہتے ہیں، اقتصادی ایجنڈا ہے جس پر دن رات محنت کررہے ہیں۔
انہوں نے کہا کہ آذربائیجان سے دو ارب ڈالر کا معاہدہ کیا، اب مہنگائی میں کمی آئی، 22 سے 11 فیصد سود رہ گیا ہے، ترقی ہوگی، عوام کی فی کس آمدنی بڑھے گی۔بانی پی ٹی آئی کے حوالے سے ان کا کہنا تھا کہ قانون اپنا راستہ خود لے گا، اسپانسرڈ قسم کی خبریں پھیلائی جاتی ہیں، سب جماعتوں سے مل کر کام کرنا چاہتے ہیں۔
نائب وزیر اعظم نے کہا کہ پاک بھارت جنگ میں تمام جماعتیں ایک پلیت فارم پر اکٹھی ہوگئیں۔ دنیا نے پاکستانیوں کی مشترکہ آواز سنی۔انہوں نے کہا کہ کرپشن کے پی سمیت جہاں بھی ہو اسے قانون کے تحت ختم ہونا چاہیے، پاکستان ڈیفالٹ کے کنارے کھڑا تھا اگر تبدیلی نہ آتی تو ڈیفالٹ آجاتا۔
ان کا کہنا تھا کہ ڈیفالٹ ہوا میں اڑ گیا، 14 ارب ڈالر زرمبادلہ پہنچ گیا ہے۔جنگ کے حوالے سے ان کا کہنا تھا کہ پاک بھارت سیز فائر قائم ہے، خطرہ تو ہر وقت ہی ہے، الرٹ رہنا ہے، اگر کوئی وار کرے، ملک میں دہشت گردی ہو رہی ہے، اس لیے تیاری کی حالت میں ہیں، 30 خوارج کو واصل جہنم کیا گیا۔
اسحاق ڈار نے کہا کہ بھارت کی مجبوری لگتی ہے، اس طرح کے بیانات سے گھبراتے نہیں، پہلے کامیابی ملی آئندہ بھی ملے گی۔انہوں نے کہا کہ سعودی عرب سے مذاکرات سات 8 ماہ سے چل رہے ہیں، عام ویزوں کا معاملہ بہتر کیا ہے، ان سے درخواست کی ہے کہ بلیو پاسپورٹ کو بھی رسائی دیں۔
اسحاق ڈار نے کہاکہ ن لیگ کو قومی اسمبلی میں سادہ اکثریت مل گئی، پیپلز پارٹی نے وزارتیں لینے کی خواہش ظاہر نہیں کی، مشکل میں ساتھ دینے والی پیپلزپارٹی کا ساتھ کبھی نہیں چھوڑیں گے۔نائب وزیراعظم نے نواز شریف کی عمران خان سے ملاقات کی خبروں کو افواہیں قرار دیتے ہوئے کہا کہ ایسی تمام خبریں افواہیں ہیں یہ کسی کی خواہش تو ہوسکتی ہے حقیقت کا اس سے کوئی تعلق نہیں۔
نواز شریف کی اڈیالہ جیل ملاقات کیلئے جانے کی بات صرف قیاس آرائی ہے۔اسحاق ڈار نے کہا کہ ہمیں اپنی مسلح افواج پر فخر ہے۔نائب وزیراعظم کا کہنا تھا کہ پاکستان اب صر ف ترقی کرے گا، مہنگائی نیچے آئی ہے ملک میں خوشحالی آئے گی، عوام کو روزگار کے مواقع ملیں گے۔
انہوں نے کہا کہ شہباز شریف دن رات کوشاں ہیں کہ ملک ترقی کی راہ پر گامزن ہو ، دعا ہے پاکستان ہمیشہ شاد و آباد رہے آج ملکی معیشت اپنے پاؤں پر کھڑی ہو رہی ہے ، ہمیں اپنی مسلح افواج پر فخر ہے، ہمارے بہادر جوان دہشتگردی کا مقابلہ کررہے ہیں۔
