کیلیفورنیا (ویب ڈیسک) – سوشل میڈیا پلیٹ فارم بلیو سکائی نے ایک نیا فیچر متعارف کرایا ہے جس کا مقصد صارفین کو لائیو اسپورٹس میچز کی بروقت نشاندہی فراہم کرنا ہے۔
ٹیکنالوجی ویب سائٹس کے مطابق، جب کوئی میچ براہ راست نشر ہو رہا ہوگا تو بلیو سکائی پر متعلقہ نشریاتی ادارے کے اکاؤنٹ کی پروفائل تصویر کے گرد ایک سرخ بارڈر اور “لائیو” کا لیبل نمایاں ہوگا۔
صارفین اس پروفائل پر کلک کرکے یوٹیوب، ٹوئچ یا دیگر اسٹریمنگ پلیٹ فارمز پر براہ راست میچ دیکھنے کے لیے منتقل ہو سکیں گے۔
بلیو سکائی کی چیف آپریٹنگ آفیسر روز وانگ نے بتایا کہ اس فیچر کا مقصد صارفین کو لائیو ایونٹس آسانی سے تلاش کرنے میں مدد دینا ہے، نہ کہ انہیں صرف بلیو سکائی تک محدود رکھنا۔ انہوں نے یہ بھی واضح کیا کہ بلیو سکائی، ایکس (سابقہ ٹوئٹر) کی طرح مہنگے اسٹریمنگ معاہدوں میں سرمایہ کاری نہیں کر رہا بلکہ صرف صارفین کو دیگر پلیٹ فارمز کی جانب رہنمائی فراہم کر رہا ہے۔
یہ فیچر فی الحال NBA اور WNBA کے اکاؤنٹس پر آزمائشی طور پر پیش کیا گیا ہے، اور مستقبل میں اسے مزید اکاؤنٹس تک وسعت دی جائے گی۔
بلیو سکائی کا یہ اقدام کھیلوں کے شوقین افراد کے لیے ایک خوش آئند تبدیلی ہے، کیونکہ وہ لائیو میچز کے دوران تبصروں اور ردعمل کے لیے سوشل میڈیا کا رخ کرتے ہیں۔ یہ نیا فیچر نہ صرف بروقت معلومات فراہم کرے گا بلکہ کھیلوں سے متعلق کمیونٹی کی ترقی میں بھی معاون ثابت ہوگا۔
