مریدکے: بلوچستان میں بہت بڑا آپریشن کے حوالے رانا تنویر نے بڑی خبردے دی۔
وفاقی وزیر نیشنل فوڈ سیکورٹی اینڈ ریسرچ رانا تنویر نے کہا ہے کہ جعفر ایکسپریس سمیت پاکستان خصوصاًبلوچستان اورخیبر پختونخواہ میں ہونے والی دہشت گردی کے واقعات میں افغانستان میں بیٹھے دہشت گروپ ملوث ہیں جن کو بھارتی خفیہ ایجنسی را اور افغان حکومت کی حمایت حاصل ہے ۔
میڈیا سے گفتگو کرتے ہوئے راناتنویر نے کہا کہ پاکستان نے افغان ناظم الامور کو طلب کیا ہے ،افغان حکومت کو آگاہ کردیا ہے کہ افغانستان میں بیٹھے پاکستان مخالف دہشت گرد گروپس ،ٹریننگ کیمپس کے خلاف سرجیکل سٹرائیکس کا ارادہ نہیں رکھتے تاہم اگر یہی صورتحال رہی تو پاکستان کو کچھ نہ کچھ فیصلہ کرنا پڑے گا۔
انہوں نے کہا کہ دہشت گردی کی موجودہ صورتحال بہت پریشان کن ہے ،حکومت اس سلسلہ میں تمام سیاسی و مذہبی جماعتوں کو جلد اکٹھا کرنے جارہی ہے ،اے پی سی بلاکر تمام جماعتوں کواعتماد میں لیا جائے گا ،نواز شریف کے دور میں ضرب عضب کے ذریعے دہشت گردی کا خاتمہ کیا گیا ،عمران خان نے جن دہشتگردوں کو چھوڑا بسایا آج انہی گروپوں کو پاکستان مخالف قوتوں کی حمایت حاصل ہے اوروہی دہشت گردی کررہے ہیں ۔
انہوں نے کہا جلد بلوچستان میں دہشتگردی کے خلاف بہت بڑا آپریشن ہونے جارہا ہے ،پاک فوج دہشت گردی پر مکمل کنٹرول کرنے کی صلاحیت رکھتی ہے ۔انہوں نے کہا پیپلز پارٹی ہماری مضبوط اتحادی ہے ،وفاق سمیت پنجاب میں کوئی ایشو نہیں ،وزارتوں سمیت دیگر ایشوز پر ایک میٹنگ ہوچکی اور اپریل میں دوبارہ میٹنگ ہو گی۔
