راولپنڈی:پاکستان تحریک انصاف کے بانی اور سابق وزیراعظم عمران خان نے پی ٹی آئی کے وفد کی جمعیت علمائے اسلام (ف) کے وفد سے ملاقات کو سراہتے ہوئے کہا ہے کہ جمہوری قوتوں کے درمیان ملاقاتیں جاری رہنی چاہئیں۔
پاکستان تحریک انصاف کے سیکریٹری جنرل سلمان اکرم راجا نے اڈیالہ جیل راولپنڈی کے باہر میڈیا سے گفتگو کرتے ہوئے کہا کہ بانی پی ٹی آئی سے ملاقات میں جے یو آئی کے وفد سے ملاقات کے حوالے سے بات ہوئی۔
ان کا کہنا تھا کہ بانی پی ٹی آئی نے ہماری ملاقات کو سراہا۔انہوں نے کہا کہ بانی پی ٹی آئی کو میں نے وزیر اعلیٰ علی امین گنڈا پور کے حوالے سے بھی بتایا، بانی نے علی امین گنڈاپور پر بھی اپنے بھرپور اعتماد کا اظہار کیا۔
بانی پی ٹی آئی نے عالیہ حمزہ اور جنید اکبر پر بھی اعتماد کا اظہار کیا، بانی پی ٹی آئی نے وکیل ظہیر عباس اور عثمان ریاض گل سے ملاقات نا کروانے پر تشویش کا اظہار کیا۔
سلمان اکرم راجا نے علیمہ خان اور وکلاء کے درمیاں ہونے والی تلخ باتوں کا جواب دینے سے گریز کیا۔
