اسلام آباد:وفاقی حکومت نے 190 ملین پاؤنڈ کی رقم سے ٹیکنالوجی یونیورسٹی اور دانش اسکولز قائم کرنے کا فیصلہ کرلیا۔ذرائع کے مطابق وفاقی حکومت نے برطانیہ کی نیشنل کرائم ایجنسی کی طرف سے پاکستان کو واپس کیے گئے منی لانڈرنگ کے190 ملین پاؤنڈزجواس وقت سپریم کورٹ کی تحویل میں ہیں کو دانش یونیورسٹی آف ایمرجنگ ٹیکنالوجیزکے قیام سمیت تعلیمی مقاصد کیلئے استعمال کرنے کا فیصلہ کیا ہے۔
وزیراعظم شہبازشریف نے اب اس رقم کو تعلیمی مقاصد کیلئے استعمال کرنے کی اجازت دیدی ہے اور سپریم کورٹ نے بھی اس پر رضامندی کا اظہارکیا ہے۔حکومت نے فیصلہ کیا کہ اس رقم سے اسلام آباد میں دانش یونیورسٹی آف ایمرجنگ ٹیکنالوجیز اوردوردراز پسماندہ علاقوں میں دانش اسکول قائم کیے جائیں گے۔
وزیراعظم شہباز شریف نے دانش اسکولوں کے قیام کا منصوبہ 2010ء میں شروع کیا تھا جس کا مقصد پسماندہ ترین علاقوں میں غریب طبقات کو معیاری تعلیم فراہم کرنا تھا۔ان اسکولوں میں سیٹیں لڑکوں اور لڑکیوں میں برابرتقسیم کی جاتی ہیں۔
وزیراعظم شہبازشریف نے ٹیکنالوجی یونیورسٹی اور دانش اسکولوں کے قیام کیلئے وفاقی وزیراحسن اقبال کی سربراہی میں ماہرین کی 10رکنی کمیٹی قائم کردی ہے جومجوزہ یونیورسٹی کے پروگرام اور اسکولوں کی فہرست تیارکرے گی۔وزیراعظم خود اس گیارہ رکنی کمیٹی کے سربراہ ہوںگے۔ذرائع کے مطابق وزیراعظم کی سربراہی میں یہ کمیٹی یونیورسٹی کے قیام کیلئے مطلوبہ قانون سازی کے علاوہ ڈیڑھ سال کے عرصے میں اس کی تعمیرکی مانیٹرنگ بھی کرے گی۔
