اسلام آباد:وزارت خزانہ نے رمضان ملک میں مہنگائی میں اضافے کا خدشہ ظاہر کردیا۔رپورٹ کے مطابق وزارت خزانہ کی جاری کردہ رپورٹ میں بتایا گیا کہ مارچ میں مہنگائی کی شرح 3 سے 4 فیصد تک ہوسکتی ہے۔
فروری میں مہنگائی 2 فیصد سے 3 فیصد تک متوقع ہے جنوری2025ء میں مہنگائی 2.41فیصد ریکارڈ کی گئی تھی۔رپورٹ میں کہا گیا کہ جولائی تاجنوری کے دوران مہنگائی کی اوسط شرح 6.50 فیصد تھی مالی سال کے پہلے سات ماہ کے دوران برآمدی صنعت نے ترقی کی۔
رپورٹ میں مارچ میں مہنگائی کی شرح تین سے چار فیصد تک محدود رہنے کا امکان ظاہر کیا گیا ہے۔رپورٹ کے مطابق پالیسی ریٹ میں کمی،ترسیلات زرمیں بلند اضافے سے مالی استحکام آیا،جولائی تا جنوری ترسیلات زر 31.7 فیصد اضافے سے 20.84 ارب ڈالر رہیں رمضان،عیدالفطر اور عیدالاضحیٰ کے دوران ترسیلات زر میں مزید اضافہ متوقع ہے۔
رپورٹ میں کہا گیا کہ براہ راست بیرونی سرمایہ کاری میں اضافہ، اخراجات کی بہتر مینجمنٹ ہوئی سات ماہ میں برآمدات میں 7.6 فیصد اضافہ ہوا،جولائی تا جنوری برآمدات کا مجموعی حجم 19.17 ارب ڈالر ریکارڈ کیا گیا،7 ماہ میں درآمدات 10.9 فیصد اضافے سے 33.31 ارب ڈالر رہیں۔
