کراچی:کراچی جیل سے 22 بھارتی ماہی گیر رہا کر دیے گئے جو کل واہگہ بارڈر پر بھارت کے حوالے کیے جائیں گے۔
کراچی کی لانڈھی ڈسٹرکٹ جیل ملیر سے 22 بھارتی ماہی گیروں کو رہا کر دیا گیا جنہیں سرکاری ادارے کی نگرانی میں ایدھی فائونڈیشن کے انتظامات پر بس کے ذریعے لاہور منتقل کردیا گیا۔سپرنٹنڈنٹ لانڈھی جیل ارشد شاہ کے مطابق رہائی پانے والے 22 بھارتی ماہی گیروں میں 3 مسلمان جبکہ 19 ہندو شامل ہیں۔
ماہی گیروں کو پاکستانی سمندری حدود میں گزشتہ ڈھائی سے 3 سال کے دوران غیر قانونی طور پر مچھلیوں کے شکار پر پاکستانی اتھارٹیز نے حراست میں لیا تھا۔ماہی گیروں نے مقامی عدالت سے ملی جرم کی سزا مکمل کر لی تھی۔جیل سے رہائی کے وقت ماہی گیروں کو اخراجات کی معقول رقم اور تحائف بھی دیے گئے ۔
