کراچی:سندھ کے سینئر وزیر شرجیل انعام میمن کی ہدایات پر محکمہ ٹرانسپورٹ نے صوبے بھر میں ان فٹ کمرشل گاڑیوں کے خلاف کریک ڈاؤن کا آغاز کردیا۔
سندھ حکومت کے محکمہ ٹرانسپورٹ نے متعلقہ حکام کوان فٹ کمرشل گاڑیوں کے خلاف کارروائیوں کی ہدایات جاری کرتے ہوئے کہا کہ بیشترگاڑیاں دوسرے صوبوں کے فٹنس سرٹیفکیٹ استعمال کر رہی ہیں، اب ان تمام گاڑیوں کوبھی سندھ سے فٹنس سرٹیفکیٹ حاصل کرنا ہوگا، یہ سنگین مسئلہ ہے۔
ان گاڑیوں کا سندھ کے ایم وی آئز کے ذریعے فزیکل معائنہ نہیں ہوا، نہ ہی انہیں مقررہ طریقہ کارکے تحت فٹنس سرٹیفکیٹ جاری کیے گئے۔شرجیل میمن کاکہناتھاکہ دیگرصوبوں میں رجسٹرڈ متعدد کمرشل گاڑیاں مستقل طورپرسندھ میں چل رہی ہیں،ایسی گاڑیوں کودوسرے صوبوں کی اتھارٹیزکی طرف سے فٹنس سرٹیفکیٹ جاری کیے ہیں۔
ہمیں لگتا ہے سرٹیفکیٹس کے اجرا کے وقت گاڑیوں کا معائنہ نہیں کیا گیا،ان سرٹیفکیٹس کی صداقت، معیار پرسوالیہ نشان ہے اور سڑکوں پران فٹ گاڑیوں کی موجودگی حادثات میں اضافے کاسبب بن رہی ہے۔ مشینی خرابیوں کی وجہ سے ڈرائیور، پیدل چلنے والوں کی زندگیاں داؤپرلگی رہتی ہیں، کمرشل گاڑیوں کوفٹنس سرٹیفکیٹس سندھ کے ایم وی آئز کے ذریعے جاری کیے جائیں گے ان میں کیوآرکوڈ سمیت جدید سیکورٹی فیچرز شامل ہوں گے۔
صوبائی سینئر وزیر نے مزید کہا کہ روٹ پرمٹ کے اجرا یا تجدید کے وقت، کیوآرکوڈ والا فٹنس سرٹیفکیٹ پیش کرنا ضروری ہوگا، ڈرائیوروں کے پاس ڈرائیونگ لائسنس ہونا بھی لازمی قرار دیا گیاہے،اقدامات کا مقصد تمام کمرشل گاڑیوں کامناسب معائنہ اورتصدیق یقینی بنانا ہے۔ان فٹ گاڑیوں کی بلا روک ٹوک نقل و حرکت انسانی جانوں کے لیے شدید خطرہ ہے، تمام کمرشل گاڑیوں کو ایک شفاف فٹنس سرٹیفکیشن سسٹم میں لایا جارہا ہے۔
