جلسے کی اجازت نہ ملی تو پی ٹی آئی کا پلان بی کیا ہوگا؟

 لاہور: پی ٹی آئی نے 8فروری کو مینار پاکستان گرا ئونڈ لاہور کے علاوہ کسی متبادل جگہ جلسہ نہ کرنے کا فیصلہ کرتے ہوئے اجازت نہ ملنے کی صورت میں پلان بی بھی مرتب کرلیا۔
ذرائع کے مطابق پی ٹی آئی نے 8فروری کو مینار پاکستان پر جلسے کی اجازت نہ ملنے کی صورت میں پنجاب کے تمام اضلاع میں احتجاج کرنے کا فیصلہ کیا ہے۔
پی ٹی آئی ذرائع کا کہنا ہے کہ اس حوالے سے پارٹی کے تمام ارکانِ اسمبلی اور رہنمائوں کو اپنے اپنے حلقوں میں احتجاج کرنے کی ہدایت بھی کی جائے گی۔
ذرائع کے مطابق لاہور کے اہم مقامات جیسے لبرٹی چوک، آزادی چوک اور مال روڈ پراحتجاج کے ساتھ تمام حلقوں میں احتجاجی ریلیاں بھی نکالی جائیں گی۔
دوسری جانب پی ٹی آئی رہنما کا کہنا ہے کہ حکومت جلسے کی اجازت نہ دے کر ہمارے احتجاج کو کامیاب بنائے گی۔