کراچی میں سرد موسم سے بچوں میں نمونیا، سانس کی نالی کے انفیکشن اور دیگر امراض تنفس میں اضافہ ہونے لگا ہے، 5 سال سے کم عمر بچے سب سے زیادہ متاثر ہو رہے ہیں۔
میڈیا رپورٹ کے مطابق سرد موسم کے دوران شہر قائد کے ہسپتالوں میں سانس کے امراض میں مبتلا مریضوں کی تعداد میں اضافہ دیکھا گیا ہے، بالخصوص بچوں میں نمونیا، سانس کی نالی کے انفیکشن اور دیگر امراض تنفس میں اضافہ ہوا ہے۔صدر پاکستان پیڈیاٹرکس ایسوسی ایشن ڈاکٹر وسیم جمالوی نے کہا کہ سردیوں کے آغاز کے ساتھ ہی بچوں میں سانس کی بیماریوں میں اضافہ ہوجاتا ہے۔انہوں نے کہا کہ سول اسپتال میں جون 2024ء سے دسمبر 2024ء تک سانس کے مختلف امراض کے 4 ہزار سے زائد کیسز رپورٹ ہوئے ہیں۔
انہوںنے مشورہ دیا کہ بچوں کو گرم کپڑوں میں رکھیں اور ٹھنڈی ہوا سے بچائیں، بند کمروں میں تازہ ہوا کی آمد کو یقینی بنایا جائے۔ بچوں کو بار بار ہاتھ دھونے کی عادت ڈالیں، بیمار بچوں کو اسکول بھیجنے سے گریز کیا جائے۔وائرل انفیکشن سے بچوں کے بچاؤ کے لیے ویکسی نیشن پر توجہ دی جائے۔
