اسلام آباد/لاہور/ کراچی(خبرایجنسیاں) وفاق المدارس العربیہ پاکستان نے مدارس کی حیثیت تبدیل کرنے کی کوششوں کے خلاف مزاحمت کا اعلان کردیا۔ وفاق المدارس العربیہ کا اہم اجلاس مفتی محمد تقی عثمانی کی صدارت میں آس اکیڈمی لاہور میں منعقد ہوا۔
اجلاس میں ناظم اعلیٰ وفاق المدارس العربیہ پاکستان مولانا محمد حنیف جالندھری،سرپرست وفاق المدارس مولانا حافظ فضل الرحیم اشرفی،نائب صدر وفاق مولانا سعید یوسف،مولانا مفتی محمد طیب،مولانا قاری احمد میاں تھانوی،علامہ زاہد محمود قاسمی،میاں محمد اجمل قادری،مولانا منور صدیقی اور دیگر نے شرکت کی۔
یہ بھی پڑھیے
قائدین وفاق المدارس نے اجلاس سے خطاب کرتے ہوئے کہا کہ دینی مدارس کے مقاصد سے انحراف کا تصور بھی نہیں کیا جا سکتا،مدارس اللہ والے اور قرآن و سنت کے ماہرین پیدا کرنے کے مراکز ہیں اور ان کی حیثیت کو تبدیل کرنے کی کوئی کوشش قابل قبول نہیں۔
وفاق المدارس کے قائدین نے اس عزم کا اظہار کیا کہ مدارس آزادی و خودمختاری سے اپنا کام جاری رکھیں گے اور کسی قسم کی مداخلت اور ڈکٹیشن ہرگز قبول نہیں کی جائے گی، قائدین نے مطالبہ کیا کہ قومی اسمبلی اور سینٹ کی طرح صوبائی اسمبلیوں سے بھی مدارس ایکٹ پاس کروایا جائےـاجلاس کے دوران وفاق المدارس کے سالانہ امتحانات کے حوالے سے بھی ہدایات دی گئیں اور ناظم اعلیٰ وفاق المدارس مولانا محمد حنیف جالندھری نے اپنے تفصیلی خطاب میں شرکاء اجلاس کو بتایا کہ اس سال ایک لاکھ بارہ ہزار طلبہ و طالبات نے وفاق المدارس سے ملحقہ مدارس سے حفظ قرآن کریم کی تکمیل کی سعادت حاصل کی جبکہ6 لاکھ تیس ہزار دو سو پچاس طلبہ و طالبات شعبہ کتب کے امتحان میں شرکت کریں گے۔
