سندھ کابینہ میں توسیع،کتنے ترجمان اور معاونین خصوصی شامل کیے گئے؟

کراچی(اسلام ڈیجیٹل)سندھ کابینہ میں بڑی توسیع کرتے ہوئے وزیر اعلیٰ مراد علی شاہ نے مزید 8 ترجمان اور 12 معاون خصوصی کی تقرریوں کی منظوری دے دی ۔ نجی ٹی وی کے مطابق وزیر اعلیٰ نے سندھ حکومت کے لیے 8 ترجمانوں کی منظوری دے دی جس کے بعد نوٹیفکیشن بھی جاری کر دیا گیا۔
ترجمانوں میں نادر نبیل گبول، سکھدیوا سرداس ہیمنانی، بلند خان جونیجو، سمیتا افضل، سیدہ تحسین عابدی، ہیر سوہو، سیدہ اقربا فاطمہ اور مصطفیٰ عبداللہ بلوچ شامل ہیں۔ سندھ حکومت کے ترجمانوں کی تعداد 18 ہو گئی ۔اس کے علاوہ سندھ حکومت نے 12 معاونین خصوصی بھی مقرر کر دیے ہیں۔نوٹیفکیشن کے مطابق رضا ہارون، پیر سید افضال، لیاقت علی اسکانی، تنزیلہ ام حبیبہ، امیر حمزہ رئیس، خیر محمد شیخ، امان اللہ محسود، کلثوم چانڈیو، محمد علی راشد، محمد علی بھٹو، حسین اسلم اور ویرجی کولہی کو معاونین خصوصی مقرر کیا گیا ۔ معاونین خصوصی کی تعداد 22 ہو گئی ۔