حج درخواستیں جمع کروانے سے رہ جانے والے عازمین کے لیے دو خوشخبریاں

لاہور : حج درخواستیں جمع کروانے سے رہ جانے والے عازمین کے لیے دو خوشخبریاں، وزارت مذہبی امور کا بچ جانے والے کوٹے پر دوبارہ درخواستیں لینے کا فیصلہ کیا ہے۔ وزارت مذہبی امور کے مطابق سرکاری اسکیم کے تحت مزید5ہزارافراد کو حجاز مقدس بھیجاجائے گا، آئندہ ہفتے سے پہلے آئیے پہلے پائیے کی بنیاد پر پانچ ہزار درخواستیں وصول کی جائیں گی،نئی حج درخواستوں کی وصولی کیلئے 5 روز مقرر کرنے کی تجویز زیر غور ہے۔
وزارت مذہبی امورنے نئی حج درخواستوں پرقرعہ اندازی نہ کرانے کا بھی فیصلہ کیا ہے۔ ذرائع وزارت مذہبی امور کے مطابق سرکاری حج اسکیم کے تحت باقی رہ جانے والے پانچ ہزار کے کوٹے پر 10 جنوری سے پہلے آئیے پہلے پائیے کی بنیاد پر درخواستیں وصول کی جائیں گی۔ ترجمان مذہبی امور نے ہدایت کی ہے کہ تمام نامزد بینک روزانہ کی بنیاد پر جمع درخواستوں کو پورٹل پر فوری اَپ لوڈ کریں، تعداد مکمل ہونے پر درخواستوں کی وصولی فوری روک دی جائے گی۔
ترجمان کے مطابق نئے درخواست گزار پہلی دو قسطوں کی مد میں 6 لاکھ جمع کروائیں گے، قربانی یا الگ کمرے کے اضافی اخراجات ہوں گے۔نئی حج درخواستوں پر قرعہ اندازی نہ کرنے کا فیصلہ کیا گیا ہے، پہلے آئیے پہلے پائیے کی بنیاد پر کنفرم حج ٹکٹ دیا جائے گا۔حکومت کو سرکاری حج اسکیم کے تحت ساڑھے 81 ہزار درخواستیں موصول ہوئی تھیں، حکومت نے فیصلہ حج کوٹا سعودی عرب کوواپس کرنے سے بچنے کیلئے کیا۔