راولپنڈی(اسلام ڈیجیٹل) بانی پی ٹی آئی عمران خان اور ان کی اہلیہ بشریٰ بی بی کے خلاف 190ملین پائونڈ ریفرنس کا فیصلہ ایک بار پھر موخر ہوگیا۔
احتساب عدالت کے جج ناصر جاوید رانا نے آج فیصلہ سنانا تھا۔عدالت نے 190ملین پائونڈ ریفرنس کا فیصلہ 18دسمبر کو محفوظ کیا تھا، پہلے 23دسمبر کو کیس کا فیصلہ سنائے جانے کی تاریخ مقرر کی گئی تھی تاہم عدالت نے فیصلہ سنائے جانے کی تاریخ ملتوی کرکے 6جنوری مقرر کی تھی۔
ذرائع کا کہنا ہے کہ 190ملین پائونڈ ریفرنس کا فیصلہ ایک بار پھر موخر کردیا گیا ہے ۔فیصلہ سنائے جانے کی نئی تاریخ سے متعلق وکلا کو آگاہ کیا جائے گا ۔یادرہے کہ 190ملین پائونڈ ریفرنس کا جیل ٹرائل ایک سال میں مکمل ہوا ہے۔
بانی پی ٹی آئی عمران خان کے خلاف یہ واحد کیس ہے جس کا ٹرائل ایک سال تک چلا۔نیب نے 13نومبر 2023ء کو 190ملین پائونڈ ریفرنس میں بانی پی ٹی آئی کی گرفتاری ڈالی۔نیب نے 17دن تک بانی پی ٹی آئی سے اڈیالا جیل میں تفتیش کی۔یکم دسمبر2023ء کو نیب نے 190ملین پائونڈ ریفرنس احتساب عدالت میں دائر کیا۔ریفرنس فائل ہونے کے بعد بانی پی ٹی آئی اور بشریٰ بی بی سے اڈیالاجیل میں تفتیش کی گئی۔
عدالت نے 27فروری 2024ء کو بانی پی ٹی آئی اور بشریٰ بی بی پر فرد جرم عائد کی۔190ملین پائونڈ ریفرنس میں 100سے زائد سماعتیں ہوئیں۔نیب نے پہلے 59گواہان کی فہرست عدالت میں جمع کرائی۔59گواہان میں سے 24گواہان کو نیب نے ترک کیا۔ریفرنس میں کل 35گواہان کے بیانات قلمبند کیے گئے۔وکلائے صفائی نے تمام 35گواہان پر جرح مکمل کی۔
ریفرنس کے تفتیشی افسر میاں عمر ندیم پر بانی پی ٹی آئی کے وکلا نے 38سماعتوں کے بعد جرح مکمل کی۔ریفرنس میں سابق پرنسپل سیکرٹری اعظم خان، سابق وزیراعلیٰ کے پی پرویز خٹک گواہوں میں شامل ہوئے۔
