پشاور(اسلام ڈیجیٹل)ٹل پاراچنار شاہراہ ہر قسم کی آمد و رفت کیلئے مسلسل بند ہے جس سے شہریوں کو شدید مشکلات کا سامنا ہے، اپر کرم کی چار لاکھ نفوس پر مشتمل آبادی علاقے میں محصور اور اشیائے ضروریہ کی ترسیل اور فراہمی معطل ہے۔ راستوں کی بندش، بدامنی اور دہشت گردی کے خلاف کرم پریس کلب پر دھرنا جاری ہے۔شرکاء کا کہنا ہے کہ راستے کھولنے اور محفوظ بنانے تک دھرنا جاری رہے گا۔ضلعی انتظامیہ نے کہا کہ 80 گاڑیوں پر مشتمل قافلہ تاحال متاثرہ علاقوں کے لیے روانہ نہیں ہو سکا ہے۔انتظامیہ نے بتایا کہ روڈ کلیئر ہوتے ہی قافلہ روانہ کیا جائے گا۔
مشیر اطلاعات خیبر پختونخوا بیرسٹر ڈاکٹر سیف نے کہا کہ گرینڈ جرگے کے معاہدے کے مطابق کرم میں ہر حال میں امن کو یقینی بنایا جائے گا اور امن دشمنوں سے آہنی ہاتھوں سے نمٹا جائیگا۔ انہوں نے کہا کہ ڈپٹی کمشنر پر حملہ امن کو سبوتاژ کرنے کی ناکام مذموم سازش تھی،کرم کے عوام امن دشمن عناصر سے ہوشیار رہیں، علاقے میں پائیدار امن کے لئے انتظامیہ اور حکومت کے ساتھ تعاون کریں۔ بیرسٹر ڈاکٹر سیف نے کہا کہ سیکورٹی خدشات کے پیش نظر قافلے کو وقتی طور روک دیا گیا ہے، کلیئرنس ملنے کے بعد عنقریب قافلے کو روانہ کیا جائیگا۔
خیبرپختونخوا حکومت نے ڈپٹی کمشنر کرم پر حملے میں ملوث دہشت گردوں کے سروں کی قیمت مقرر کرنے کا فیصلہ کیا ہے۔بگن واقعے کے بعد وزیراعلیٰ خیبرختونخوا علی امین گنڈاپور کی زیر صدارت صوبائی حکومت کے اعلیٰ حکام کا ہنگامی اجلاس ہوا جس میں واقعے کے بعد کی صورتحال کا جائزہ لیا گیا۔صوبائی حکومت کے اجلاس میں کہا گیا کہ علاقے کے لوگ معاہدے کی خلاف ورزی کے ذمہ دار ہیں، اس میں ملوث افراد کو قانون کے حوالے کیا جائے گا، تمام ملوث افراد کو فوری گرفتار کیا جائے، دہشت گردوں کی سروں کی قیمت مقرر کی جائے گی، کسی دہشت گرد سے کوئی رعایت نہیں برتی جائے گی اور نہ ان کی معاونت کرنے والوں کو چھوڑا جائے گا۔
ادھرلوئر کرم کے علاقے بگن میں ڈپٹی کمشنر جاوید اللہ محسود کی گاڑی پر حملہ کرنے والوں کی شناخت ہوگئی، حملہ آوروں کے ساتھ سہولت کار بھی ملوث ہیں جن کی تعداد 5ہے، ان کے خلاف مقدمہ درج کرکے گرفتاری اور قانونی کارروائی کی جائے گی، اہلیان علاقہ اور جرگہ مشران سے بھی ملزمان کی گرفتاری میں مدد لی جائے گی۔
واقعے کا مقدمہ محکمہ انسداد دہشت گردی(سی ٹی ڈی) میں درج کرنے کا فیصلہ کیا گیا ہے۔ پولیس ذرائع کا کہنا ہے کہ اس سلسلے میں پولیس نے واقعے کی روزنامچہ رپورٹ تیارکرلی۔پولیس کی جانب سے تیار کردہ رپورٹ میں 5افراد کو نامزد کیا گیا ہے۔
