تحریک انصاف کے روپوش رہنما مونس الہٰی نے کہا ہے کہ بانی پی ٹی آئی کو ریلیف ملے گا تو ویسے ہی ہمیں بھی ملے گا۔
سوشل میڈیا پر گفتگو کرتے ہوئے مونس الہٰی نے کہا کہ بانی پی ٹی آئی باہر آئیں گے تو میرے، حماد اظہر، مراد سعید اور دیگر رہنماؤں کی واپسی کے امکانات ہوں گے۔
مونس الہٰی نے کہا کہ ہمارے لیے جیل اور ایف آئی اے والا نہیں بلکہ الگ پلان بنا ہوا ہے، بانی پی ٹی آئی کی رہائی کے لیے زیادہ کوششیں نہیں ہو رہی ہیں، ہم کور کمیٹی اور وکلاء کے ساتھ بھی بانی پی ٹی آئی کی رہائی کا معاملہ اٹھا رہے ہیں۔
انہوں نے کہا کہ وکلاء کی توجہ صرف بانی پی ٹی آئی کے کیسز پر ہونی چاہیے، وکلاء کی توجہ پریس کانفرنس، ٹاک شوز اور حلقے کی سیاست پر نہیں ہونی چاہیے۔
مونس الہٰی کا مزید کہنا تھا کہ بانی پی ٹی آئی کے کیسز پر توجہ ہوگی تو جلد نتائج سامنے آئیں گے۔
