بانی پاکستان تحریک انصاف (پی ٹی آئی) اور بشریٰ بی بی کے خلاف عدت میں نکاح کیس کی سماعت کے دوران بانی پی ٹی آئی، بشریٰ بی بی اور خاور مانیکا کے درمیان جھگڑا ہوگیا۔
راولپنڈی کی اڈیالہ جیل میں عدت میں نکاح کیس کی سماعت سینئر سول جج قدرت اللّٰہ نیازی نے کی، سماعت کے دوران بشریٰ بی بی اور بانی پی ٹی آئی کمرہ عدالت میں موجود تھے۔
دوران سماعت بانی پی ٹی آئی، بشریٰ بی بی اور خاور مانیکا کے درمیان جھگڑا ہوگیا، بانی پی ٹی آئی نے جج قدرت اللّٰہ سے مکالمہ کرتے ہوئے کہا کہ میں اور بشریٰ بی بی قرآن پاک پر حلف لینے کو تیار ہیں خاور مانیکا بھی حلف لے۔
بانی پی ٹی آئی نے کہا کہ بشریٰ بی بی کو نکاح کے دن دیکھا، قرآن اٹھانے کو تیار ہوں، جس پر خاور مانیکا نے جواب دیتے ہوئے کہا کہ تم جھوٹ بول رہے ہو خدا سے ڈرو، تم نے میرا گھر برباد کیا۔
بانی پی ٹی آئی نے عدالت سے قرآن پاک پر حلف لینے کی ضد کی۔
عدت میں نکاح کیس کی سماعت کل تک ملتوی کردی گئی، عدالت نے تمام چار گواہان کے بیانات قلمبند کر لیے، گواہان میں مفتی سعید، عون چوہدری، خاور مانیکا اور محمد لطیف شامل تھے۔
بشریٰ بی بی کے وکیل عثمان ریاض گل نے 2 گواہان خاور مانیکا اور عون چوہدری پر جرح مکمل کرلی، بشریٰ بی بی کے وکیل کل مزید 2 گواہان محمد لطیف اور مفتی سعید پر جرح کریں گے۔
بانی پی ٹی آئی کے وکیل سلمان اکرم راجہ کل چاروں گواہان پر جرح کریں گے۔
