مسلم لیگ ن کے سینیٹر رانا محمود الحسن نے پیپلز پارٹی میں شمولیت اختیار کرلی۔
ملتان میں پیپلز پارٹی کے چیئرمین بلاول بھٹو نے سینیٹر رانا محمود الحسن کی رہائشگاہ پر میڈیا سے گفتگو کرتے ہوئے کہا کہ عوام کے مسائل حل کرنے کے لیے الیکشن میں حصہ لے رہے ہیں جبکہ ایک جیل سے بچنا چاہتا ہے اور دوسرا جیل سے نکلنا چاہتا ہے، ہمارے اور دیگر جماعتوں کے نظریے میں فرق ہے۔
بلاول بھٹو نے کہا کہ دیگر جماعتیں امیروں کو ریلیف اور عوام کو تکلیف دیتی ہیں، کوشش ہے پیپلز پارٹی کا وزیراعظم بنے، ہمیں لیول پلیئنگ فیلڈ ملے یا نہ ملے ہم اپنا بندوبست کرلیتے ہیں۔
’ڈرنے اور جھکنے والے نہیں مقابلے کیلئے تیار ہیں‘
انہوں نے کہا کہ پچھلےالیکشن میں بانی پی ٹی آئی دھاندلی کرنے میں کامیاب ہوئے، پیپلز پارٹی ڈرنے اور جھکنے والی نہیں مقابلہ کرنے کے لیے تیار ہے، سکھر کی طرح ملتان میں بھی صحت کے ادارے بنائیں گے۔
بلاول بھٹو نے کہا کہ بے نظیر مزدور کارڈ کے ذریعے مزدوروں کی مالی مدد کرنا چاہتے ہیں، نوجوانوں کو تعلیم اور جو بھی ضرورت ہوگی پوری کی جائے گی، خواہش ہے ہم عوام کے لاڈلے بنیں، عوام طاقت کا سرچشمہ ہیں۔
پیپلز پارٹی کے چیئرمین نے کہا کہ دوسرے اِدھر اُدھر دیکھ رہے ہیں، میں آپ کی طرف دیکھ رہا ہوں، ہمارے اور دیگر جماعتوں کے نظریے میں فرق ہے، پیپلز پارٹی ہی وہ واحد جماعت ہے جو سب کی نمائندگی کرتی ہے۔
’ہم 8 فروری کو سرپرائز دیں گے‘
بلاول بھٹو نے کہا کہ عوام کے مسائل حل کرنے کے لیے الیکشن میں حصہ لے رہے ہیں، ہم 8 فروری کو سرپرائز دیں گے، لوگوں کو اپنی الیکشن مہم شروع کرنی چاہیے، غلط فہمی میں نہ رہیں کہ الیکشن نہیں ہوں گے۔
بلاول بھٹو زرداری نے کہا کہ پی ٹی آئی نے اپنے انٹرا پارٹی الیکشن میں گڑ بڑ کی، ہوسکتا ہے ان کو اپنی غلطیوں کی وجہ سے دوسرے نشان پر الیکشن لڑنا پڑے گا۔
