کراچی: لانڈھی میں مکان کی دوسری منزل پر گیس لیکیج کے باعث دھماکے میں خاتون جاں بحق، جوان بیٹی اور دو بیٹے جھلس کر زخمی ہوگئے، آتشزدگی سے گھر کا تقریباً سامان جل گیا۔
لانڈھی تھانے کے علاقے لانڈھی نمبر 4 شاہی مسجد کے قریب 2 منزلہ مکان کی دوسری منزل پر گیس لیکیج کے باعث زوردار دھماکا ہوا اور آگ بھڑک اٹھی، دھماکے کے بعد فائر بریگیڈ نے پہنچ کر آگ پر قابوپایا ساتھ ہی پولیس اور امدادی ادارے بھی پہنچ گئے۔
دھماکے کے سببب گھر میں موجود خاتون، لڑکی اور 2 بچے جھلس کر زخمی ہوگئے جنہیں اسپتال منتقل کردیا گیا جہاں خاتون دم توڑ گئیں، ان کی شناخت 35 سالہ فائزہ زوجہ فیصل کے نام سے ہوئی، زخمیوں میں 19 سالہ بیٹی میہا دختر فیصل اور دو بیٹے 8 سالہ سبحان اور 13 سالہ آلیان شامل ہیں، دونوں بیٹے معمولی جھلس کر زخمی ہوئے ہیں انہیں فوری طبی امداد دینے کے بعد گھر روانہ کردیا گیا جبکہ متوفیہ خاتون کی بیٹی میہا اسپتال میں زیر علاج ہے۔
متاثرہ خاندان گزشتہ تین روز سے شادی کی تقریب میں شرکت کے لیے حیدرآباد گیا ہوا تھا، رات گئے متاثرہ خاندان کے افراد واپس لوٹے اور سوگئے، دوپہر میں اٹھنے کے بعد گھر کی خاتون نے کچن میں جاکر ماچس سلگائی تو زور دار دھماکے کے ساتھ آگ گھر میں پھیل گئی، ممکنہ طور پر دھماکا گیس لیکیج کے باعث ہوا تاہم اس حوالے سے تفتیش کی جا رہی ہے۔
علاقہ مکینوں کے مطابق علاقے میں کئی روز سے سوئی گیس کی لوڈ شیڈنگ جاری ہے ممکن ہے کہ گیس کھلی رہ گئی ہو اور گیس کے اخراج سے گیس جمع ہو گئی اور جسے ہی دوپہر میں چولہا چلانے کے لیے ماچس چلائی گئی تو دھماکا ہو گیا۔
محکمہ فائر بریگیڈ کے مطابق 2 منزلہ مکان کی دوسری منزل پر دھماکے کے بعد گھر میں آگ بھڑک اٹھی تھی، فائربریگیڈ عملہ پہنچا توآگ لگی ہوئی تھی، دھماکا 2 منزلہ مکان کی دوسری منزل کے باورچی خانے میں ہوا اور آگ نے مکان کے باورچی خانے سمیت 2 کمروں کو اپنی لپیٹ میں لے لیا تھا، آتشزدی کے دوران مکان کے باورچی خانے اور کمروں میں موجود سامان جل کر خاکستر ہوگیا۔
