یوکرین کی ملٹری انٹیلی جنس کے سربراہ نے دعویٰ کیا ہے کہ روس کے صدر ویلادیمیر پیوٹن کینسر کے مرض میں مبتلا ہیں جو کہ آخری اسٹیج پر ہے اور وہ جلد مرنے والے ہیں۔
غیرملکی میڈیا کے مطابق یوکرین کی وزارت دفاع کے مین انٹیلی جنس ڈائریکٹوریٹ کے سربراہ نے یہ بات زور دے کر کہی ہے کہ روسی صدر کی کینسر کے باعث موت بہت قریب ہے۔
امریکی ٹی وی پر انٹرویو کے دوران انہوں نے کہا کہ روسی صدر طویل عرصے سے بیمار ہیں۔
انٹرویو کے دوران ان سے پوچھا گیا کہ آپ کب سمجھتے ہیں کہ ویلادیمیر پیوٹن مر جائیں گے، جس پر انہوں نے جواب دیا کہ میں سمجھتا ہوں کہ روسی صدر بہت جلد مر جائیں گے۔
یوکرین کی ملٹری انٹیلی جنس کے سربراہ نے کہا کہ ہمیں لگتا ہے کہ روسی صدر کو کینسر ہے اور یہ بات ہمیں ان کے قریبی ذرائع سے معلوم ہوئی ہے۔
انہوں نے مزید کہا کہ ویلادیمیر پیوٹن کی موت کے بعد کسی دوسرے روسی رہنما کو اقتدار کی منتقلی کا بھی امکان ہے۔
دوسری جانب گزشتہ ماہ روسی ماہر نے یوکرینی میڈیا کو بتایا تھا کہ جدید علاج اور طریقوں کی مدد سے روسی صدر کے کینسر کو پھیلنے سے روکا جارہا ہے۔
واضح رہے کہ روسی صدر ولادیمیر پیوٹن اپنی صحت کی وجہ سے اکثر ہی بین الاقوامی میڈیا کی توجہ کا مرکز بنے رہتے ہیں، اور جب سے روس نے یوکرین میں مداخلت کی ہے، یہ افواہیں گردش کر رہی ہیں کہ وہ شدید بیمار ہیں۔
