پی پی پی چیئرمین و وزیرخارجہ بلاول بھٹو زرداری نے کہا ہے کہ موسمی تبدیلیوں کے باعث پاکستان میں اس باراپریل سے ہی بارشیں شروع ہوگئیں،امیر ممالک کے پیدا کردہ موسمیاتی بحران کا خمیازہ غریب اقوام بھگتنے پرمجبورہیں۔
ملک کے مختلف علاقوں میں بارش کی صورتحال پر جاری ایک بیان میں بلاول بھٹو زرداری کہا کہ بلوچستان سمیت ملک کے مختلف علاقوں کےندی نالوں میں طغیانی کی صورتحال ہے،گذشتہ ریکارڈ بارشوں کے متاثرین کی آج بھی ایک بڑی تعداد مدد کی منتظر ہے،بارشوں کے دوران بہہ جانے والے لاکھوں گھروں اورانفراسٹرکچر کی ازسرنو بحالی کا کام ابھی مکمل نہیں ہوا۔
وزیر خاجہ نے اپیل کرتے ہوئے کہا کہ این ڈی ایم اے سمیت تمام متعلقہ ادارےاور حکام بارشوں کے پیش نظر ہمہ وقت چوکس رہیں، بارشوں کے دوران عوام احتیاطی تدابیر اختیار کریں، سفر کرنے سے بھی اجتناب برتیں، انہوں نے دعا کی کہ اللہ تعالیٰ پاکستان کو ہر مصیبت سے بچائے۔ جیالے اپنے اپنے علاقوں میں امدادی کاموں کے حوالے سے انتظامیہ سے رابطے میں رہیں۔
پی پی پی چیئرمین بلاول بھٹو نے بلوچستان، سندھ، جنوبی پنجاب اور خیبرپختونخوا میں بارش کے دوران حادثات میں قیمتی جانوں کے ضیاع پر رنج و غم کا اظہار کرتے ہوئےاپنے پیاروں کو کھونے والے خاندانوں سے دلی تعزیت کی۔
