راولپنڈی: خیبر پختونخوا اور بلوچستان میں سیکیورٹی فورسز کی کارروائیوں میں 11 دہشتگرد ہلاک ہو گئے۔سیکیورٹی ذرائع کے مطابق فورسز نے خیبرپختونخوا اور بلوچستان میں فتنہ الخوارج اور فتنہ الہندوستان کے دہشتگردوں کے خلاف کامیاب کارروائیاں کرتے ہوئے 11 دہشتگردوں کو جہنم واصل کردیا۔ کارروائیوں کے دوران اسلحہ و گولہ بارود بھی برآمد کیا گیا۔
ذرائع کے مطابق خیبرپختونخوا کے علاقوں جنوبی وزیرستان اور بنوں جبکہ بلوچستان کے ضلع خضدار میں انٹیلی جنس بیسڈ آپریشنز کیے گئے۔ ان کارروائیوں میں فتنہ الخوارج اور فتن الہندوستان سے تعلق رکھنے والے 11 دہشتگرد ہلاک ہوئے۔بنوں میں سیکیورٹی فورسز نے فتنہ الخوارج کے خلاف انٹیلی جنس بیسڈ آپریشن کیا، جس کے دوران 2 دہشتگرد جہنم واصل ہوئے۔ کارروائی کے دوران اسلحہ اور گولہ بارود بھی برآمد کیا گیا جبکہ سیکیورٹی فورسز نے بارودی مواد سے دہشتگردوں کے ٹھکانے کو تباہ کردیا۔
سیکیورٹی ذرائع کے مطابق جنوبی وزیرستان کے علاقے لدھا میں فورسز نے خفیہ اطلاع پر کارروائی کی، جس کے نتیجے میں 5 خوارج جہنم واصل ہوئے۔ سیکیورٹی فورسز نے فتنہ الخوارج کے دہشتگردوں کی نقل و حرکت کا بروقت سراغ لگایا اور انہیں گھیرے میں لے کر موثر کارروائی کی۔بلوچستان کے ضلع خضدار کے علاقے ساسول میں بھی فتنہ الہندوستان کے خلاف کارروائی کی گئی، جس میں 4 دہشتگرد جہنم واصل ہوئے۔ سیکیورٹی ذرائع کے مطابق سیکیورٹی فورسز نے فتنہ الہندوستان کے دہشتگردوں کو کوارڈ کاپٹر کی مدد سے موثر انداز میں نشانہ بنایا۔
سیکیورٹی ذرائع کے مطابق کارروائیوں میں اس بات کو یقینی بنایا گیا کہ عوام کے جان و مال کا تحفظ برقرار رہے اور مقامی آبادی کو کسی قسم کا نقصان نہ پہنچے۔سیکیورٹی فورسز کی جانب سے ملک سے دہشتگردی کے ناسور کے مکمل خاتمے تک عزم استحکام ویژن کے تحت کارروائیاں جاری ہیں۔
