ملک بھر میں اپریل 2026 میں بارشیں معمول سے 65 فیصد زیادہ ریکارڈ ہوئیں، اوسط بارش 41.1 ملی میٹر کے ساتھ حالیہ برسوں میں نمایاں اضافہ رہا۔
محکمہ موسمیات نے اپریل کے مہینے میں موسمی صورتحال کے متعلق کلائمٹ سمری جاری کر دی۔
کلائمٹ سمری کے مطابق اپریل کا اوسط درجہ حرارت 25.0 ڈگری مجموعی طور پر معمول کے مطابق رہا تاہم دن کا زیادہ سے زیادہ درجہ حرارت معمول سے 7 ڈگری کم جبکہ رات کا درجہ حرارت معمول سے 8 ڈگری زیادہ ریکارڈ ہوا۔
سندھ کے شہر شہید بینظیرآباد میں اپریل میں سب سے زیادہ درجہ حرارت 47.5 ڈگری ریکارڈ ہوا جبکہ مٹھی گرم ترین مقام رہا جہاں زیادہ سے زیادہ درجہ حرارت 39.9 ڈگری ریکارڈ ہوا۔
خیبر پختونخوا کے علاقے چیراٹ میں ایک دن میں 101.4 ملی میٹر شدید بارش ریکارڈ ہوئی جبکہ پارا چنار اپریل کا سب سے زیادہ بارش والا علاقہ رہا جہاں 283.6 ملی میٹر بارش ہوئی۔
کالام اور مالم جبہ میں کم ترین درجہ حرارت 1.5 ریکارڈ ہوا۔
محکمہ موسمیات کے مطابق نینو صورتحال اس وقت نیوٹرل ہے، اس وقت نہ اَل نینو کی صورتحال اور نہ ہی لا نینا کی صورتحال ہے۔
موسمیاتی ماڈلز کے مطابق آئندہ مہینوں میں ال نینو فعال ہونے کا امکان ہے جبکہ انڈین اوشن ڈائی پول بھی نیوٹرل فیز میں داخل ہوگیا۔
