پاکستان اور سعودی عرب کے درمیان آئی ٹی، اسپورٹس تعاون کی یادداشتوں پر دستخط

کراچی: پاکستان اور سعودی عرب کے مابین گورنر سندھ کامران خان ٹیسوری اور سعودی شہزادہ منصور بن محمد آل سعود کی موجودگی میں آئی ٹی ایجوکیشن اور اسپورٹس کے فروغ سے متعلق دو اہم یادداشتوں پر دستخط ہوگئے۔
یہ یادداشتیں پاکستان اور مملکتِ سعودی عرب کے درمیان نوجوانوں کی ترقی، ٹیکنالوجی کے فروغ اور کھیلوں کے شعبے میں تعاون کے نئے دور کا آغاز ہیں۔ تقریب میں سعودی عرب کے سفیر نواف سعید المالکی، کراچی میں سعودی قونصل جنرل محمد عبداللہ السبیعی، سعودیہ میں تعینات پاکستانی سفیر احمد فاروق، سعودی وفد کے دیگر ارکان سمیت مختلف شعبہ ہائے زندگی سے تعلق رکھنے والی شخصیات شریک تھیں۔
یادداشتوں کے تحت دونوں ممالک کے درمیان جدید انفارمیشن ٹیکنالوجی کی تعلیم، مشترکہ تربیتی پروگرامز، یوتھ ایکسچینج اور اسپورٹس مقابلوں کے انعقاد کے ذریعے نوجوانوں کو ترقی کے نئے مواقع فراہم کیے جائیں گے۔ گورنر سندھ کامران خان ٹیسوری نے تقریب سے خطاب کرتے ہوئے کہا کہ پاکستان اور سعودی عرب کے تعلقات تاریخی، برادرانہ اور عوامی محبت پر مبنی ہیں۔ دونوں ممالک نے ہمیشہ ایک دوسرے کے ساتھ باہمی احترام، تعاون اور اعتماد کے رشتے کو مضبوط کیا ہے۔
انہوں نے کہا کہ آئی ٹی اور اسپورٹس میں اشتراک نہ صرف نوجوانوں کی صلاحیتوں کو نکھارے گا بلکہ دوطرفہ تعلقات کو مزید مضبوط بنانے میں بھی مددگار ثابت ہوگا۔ گورنر سندھ نے عندیہ دیا کہ پاکستان اور سعودی عرب کی کرکٹ ٹیموں کے درمیان جلد ایک دوستانہ میچ منعقد کیا جائے گا جس سے دونوں ممالک کے عوامی روابط میں مزید اضافہ ہوگا۔انہوں نے کہا کہ پاکستانی نوجوان دنیا بھر میں اپنی صلاحیتوں کا لوہا منوا رہے ہیں، انہیں جدید تعلیم، تربیت اور سہولتیں فراہم کرنا حکومت کی اولین ترجیح ہے۔
گورنر سندھ نے مزید کہا کہ تعلیم، ٹیکنالوجی اور کھیل ہی روشن مستقبل کی ضمانت ہیں۔ گورنر انیشیٹیوز کے تحت نوجوانوں کو جدید دور کے تقاضوں سے ہم آہنگ بنانے کے لیے عملی اقدامات کر رہے ہیں تاکہ وہ نہ صرف اپنے خاندان بلکہ ملک و قوم کی ترقی میں مؤثر کردار ادا کر سکیں۔عالی مرتبت شہزادہ منصور بن محمد آل سعود نے گورنر سندھ کامران خان ٹیسوری کی نوجوانوں کے لیے جاری کاوشوں کو سراہا اور کہا کہ پاکستان کے نوجوان بے پناہ صلاحیتوں کے مالک ہیں، انہیں مواقع فراہم کرنے سے دونوں ممالک کے تعلقات مزید گہرے ہوں گے۔