امریکی اسٹریمنگ پلیٹ فارم **نیٹ فلکس** نے اپنے صارفین کے لیے ایک نیا فیچر متعارف کرایا ہے، جس کے ذریعے اب ٹی وی پر **ویڈیو گیمز کھیلنے کی سہولت** حاصل کی جا سکتی ہے۔
اس فیچر کے تحت صارفین اپنے **موبائل فون کو کنٹرولر کے طور پر استعمال** کرتے ہوئے بڑی اسکرین پر گیمز کھیل سکیں گے۔
غیر ملکی میڈیا کے مطابق نیٹ فلکس کے شریک چیف ایگزیکٹو **گریگ پیٹرز** نے بلومبرگ اسکرین ٹائم کانفرنس میں اعلان کیا کہ یہ اقدام **تفریح کی دنیا میں ایک نئے دور کا آغاز** ہے۔ کمپنی ایسے **سوشل گیمز** متعارف کرا رہی ہے جنہیں دوستوں اور اہلِ خانہ کے ساتھ مل کر کھیلا جا سکے گا۔
ابتدائی مرحلے میں نیٹ فلکس نے چند مقبول گیمز پیش کی ہیں جن میں **بوگل پارٹی، ٹیٹرس ٹائم واؤرپ، پکشنری گیم نائٹ** اور **لیگو پارٹی** شامل ہیں۔ صارفین یہ گیمز **اسمارٹ ٹی وی** یا **رُوکو جیسے اسٹریمنگ ڈیوائسز** پر کھیل سکیں گے، جبکہ موبائل فون کو کنٹرولر کے طور پر جوڑنے کے لیے صرف **کیو آر کوڈ اسکین** کرنا ہوگا۔
نیٹ فلکس کے گیمنگ ڈویژن کے سربراہ **ایلین ٹاسکن** کے مطابق کمپنی طویل مدتی حکمتِ عملی کے تحت **کلاؤڈ سسٹم کو بہتر** بنا رہی ہے تاکہ اس شعبے میں اپنی پوزیشن مستحکم کر سکے۔ نیٹ فلکس کا مقصد اپنی سروس کو صرف فلموں اور ڈراموں تک محدود رکھنے کے بجائے اسے **ایک جامع تفریحی پلیٹ فارم** میں تبدیل کرنا ہے۔
