اسلام آباد: پاکستان کا ہر قسم کی تجارت پر پابندی کے باوجود بھارت سے بالواسطہ درآمدات کا انکشاف ہوا ہے۔ذرائع وزارت تجارت کے مطابق اگست 2025ء میں بھارت سے پاکستان کی بالواسطہ درآمدات 3 کروڑ 20 لاکھ ڈالر رہیں۔
سالانہ بنیادوں پر اگست 2025ء میں بھارت سے بالواسطہ درآمدات 37 فیصد بڑھیں۔ذرائع وزارت تجارت کے مطابق اگست 2024 ء میں بھارت سے پاکستانی درآمدات کا حجم 2 کروڑ 33 لاکھ ڈالر تھا۔ موجودہ حکومت کے ڈیڑھ سال میں بھارت سے سالانہ بالواسطہ درآمدات میں7 بار اضافہ ہوا۔
ذرائع وزارت تجارت کے مطابق مارچ، اگست اور ستمبر 2024ء میں بھارت سے سالانہ بنیاد پر بالواسطہ درآمدات میں اضافہ ہوا تھا۔ حکام وزارت تجارت کے مطابق پاکستان نے رواں سال مئی میں بھارت کے ساتھ ہر قسم کی تجارت پر پابندی لگائی۔
یہ فیصلہ بھارت کی جانب سے سندھ طاس معاہدہ یکطرفہ معطل کیے جانے کے بعدکیا گیا۔ پاکستان نے بھارتی مصنوعات کی تیسرے ممالک سے درآمد پر بھی پابندی عائدکی تھی۔حکام وزارت تجارت کے مطابق اس سے قبل پاکستان نے اگست 2019ء میں بھارت کے ساتھ تجارت معطل کر دی تھی۔
پاکستان نے بعد میں بھارت کے ساتھ تجارت میں نرمی کی تھی۔ پاکستان نے بھارت کے ساتھ زندگی بچانے والی ادویات کی تجارت کرنے کی اجازت دی تھی۔
