پاکستان لینڈ پورٹ اتھارٹی ، پیٹرولیم ترمیمی بل 2025 کی منظوری

اسلام آباد : پاکستان لینڈ پورٹ اتھارٹی ، پیٹرولیم ترمیمی بل 2025 کی منظوری ، صدر مملکت آصف علی زرداری نے پاکستان لینڈ پورٹ اتھارٹی بل 2025 کی منظوری دے دی ہے۔
پاکستان لینڈ پورٹ اتھارٹی سرحدی گزرگاہوں پر نقل و حرکت میں سہولت فراہم کرے گی، اس اقدام سے پاکستان بھارت اور بنگلہ دیش کے بعد لینڈ پورٹ اتھارٹی قائم کرنے والا خطے کا تیسرا ملک بن گیا۔لینڈ پورٹ اتھارٹی پاکستان کے سرحدی اداروں کے ساتھ مؤثر ہم آہنگی کیلئے مضبوط طریقہ کارتشکیل دے گی، لینڈ پورٹ اتھارٹی کے قیام سے تجارتی سہولت اور علاقائی بندرگاہوں کی مسابقت بڑھانے میں مددگار ہوگی۔اتھارٹی بین الاقوامی معاہدوں کے تحت پاکستان کی ذمہ داریوں کو پورا کرنے میں کردار ادا کرے گی، یہ بل صدر مملکت آصف علی زرداری کی منظوری کے بعد ایکٹ بن گیا۔
دوسری جانب صدرِ مملکت آصف علی زرداری نے پیٹرولیم ترمیمی بل 2025کی منظوری دے دی۔صدرِ پاکستان آصف زرداری کی منظوری کے بعد پیٹرولیم ترمیمی بل 2025ء قانون بن گیا۔اعلامیے کے مطابق ترمیمی ایکٹ اسمگلنگ اور غیر قانونی پیٹرول پمپس کے خلاف اقدامات مضبوط کرتا ہے۔
اعلامیے میں کہا گیا ہے کہ ڈپٹی کمشنرز، اسسٹنٹ کمشنرز اور کسٹمز حکام کو ضبطگی کے اختیارات مل گئے، پیٹرولیم مصنوعات کی آئی ٹی بیسڈ ٹریکنگ متعارف کرائی گئی ہے۔اعلامیے میں بتایا گیا ہے کہ خلاف ورزیوں پر سخت سزائیں اور جرمانے بڑھا دیے گئے ہیں، یہ قانون پیٹرولیم شعبے کی ریگولیشن کو جدید بنانے اور شفافیت بڑھانے میں مددگار ہو گا۔اعلامیے میں یہ بھی کہا گیا ہے کہ قانون سے اسمگلنگ اور ٹیکس چوری کے خلاف سرکاری اقدامات مزید موثر ہوں گے۔