پاکستان اور جاپان کا تجارت و سرمایہ کاری بڑھانے پر اتفاق

ٹوکیو : پاکستان اور جاپان نے تجارت، سرمایہ کاری سمیت تمام شعبوں میں باہمی تعاون بڑھانے پر اتفاق کیا ہے۔
وزیر اعلیٰ پنجاب مریم نواز نے جاپانی اسٹیٹ منسٹر مایا جی ٹاکوما سے ملاقات میں نیک تمناؤں کا اظہار کیا، جاپانی اسٹیٹ منسٹر نے کہا کہ پنجاب میں 120 سے زاید منصوبوں کا آغاز قابل تحسین ہے، پاکستان کو دوست ملک کی حیثیت سے ہمیشہ اہمیت دیتے ہیں۔
جاپانی اسٹیٹ منسٹر نے پاکستان میں سیلاب کے باعث اموات اور نقصانات پر افسوس کا اظہار کیا، جس پر وزیر اعلیٰ پنجاب نے کہا کہ قدرتی آفات سے نمٹنے کیلئے جاپان کے تجربات سے استفادہ کریں گے، جاپان معاشی، ٹیکنالوجی اور معاشرتی ترقی کا گہوارہ بن چکا ہے۔
مریم نواز نے کہا کہ جاپان کی ترقی کے ماڈل کو پنجاب میں لاگو کرنا چاہتی ہوں، جاپان اور پاکستان مشکل وقت کے آزمودہ کار دوست ہیں، مشکل وقت میں ساتھ دینے پر جاپان کا شکریہ ادا کرتے ہیں۔
وزیر اعلیٰ پنجاب نے کہا کہ جاپان کی معاشرتی روایات اور اخلاقی قدریں متاثر کن ہیں، پاکستان میں تباہ کن زلزلے میں جاپان کی مدد ناقابل فراموش ہے۔ وزیراعلیٰ پنجاب مریم نوازشریف نے جاپان کو ہائبرڈ کاروں کی پنجاب میں تیاری اور اسمبلنگ کی دعوت دیدی۔
وزیراعلیٰ پنجاب مریم نواز نے ٹوکیو میں کار سازکمپنی کیہیڈ کوارٹر کا دورہ کیا جس دوران انہوں نے کارسازکمپنی کے ایگزیکٹو وائس پریزیڈنٹ سے ملاقات کی، ملاقات کے دوران الیکٹرک گاڑیوں کی مقامی پیداوار اور اسمبلنگ کے امور پر تبادلہ خیال کیا گیا۔
دوسری جانب وزیراعلیٰ پنجاب نے جاپان کے بین الاقوامی امور کے سینئر نائب وزیر سے بھی ملاقات کی، مریم نواز نے جاپان کو ہائبرڈ کاروں کی پنجاب میں تیاری اور اسمبلنگ کی دعوت دی۔اس موقع پر مریم نوازکا کہنا تھا کہ پنجاب میں الیکٹرک گاڑیوں کے فروغ کیلئے تعاون کا خیر مقدم کریں گے، لاہور اور راولپنڈی کے درمیان ہائی اسپیڈٹرین کے ذریعے نئے دور کا آغازکریں گے۔