اسلام آباد:پانچ ممالک حکومت پاکستان کے کروڑوں ڈالرز کے ڈیفالٹر نکلے۔آڈٹ رپورٹ کے مطابق ڈیفالٹر ممالک کی فہرست میں سری لنکا، بنگلا دیش، عراق، سوڈان اور گنی بسائو شامل ہیں جن سے حکومت پاکستان 30 کروڑ 45 لاکھ ڈالر ریکور کرنے میں ناکام رہی۔
رپورٹ کے مطابق پاکستان نے 1980ء اور 1990ء کی دہائی میں ان ملکوں کو ایکسپورٹ کریڈٹ دیا تھا، پاکستانی کرنسی میں قرض کی یہ رقم 86 ارب روپے سے زیادہ بنتی ہے۔آڈٹ رپورٹ کے مطابق عراق کے ذمے سب سے زیادہ 23 کروڑ 13 لاکھ ڈالر واجب الادا ہیں جبکہ پاکستان نے سوڈان سے 4 کروڑ 66 لاکھ ڈالر وصول کرنے ہیں۔
بنگلا دیش کے ذمیشوگر پلانٹ اور سیمنٹ کی مد میں 2 کروڑ 14 لاکھ ڈالر ہیں جبکہ پاکستان نے گنی بسائو سے 36 لاکھ 53 لاکھ ڈالر وصول کرنے ہیں۔رپورٹ میں کہا گیا ہے کہ سال 07ـ2006ء میں بھی آڈیٹر جنرل نے ریکوری کی نشاندہی کی تھی، ان 5 ملکوں کو یاددہانی کے خط اور ڈیمانڈ نوٹسز بھی بھجوائے گئے۔آڈیٹر جنرل کی جانب سے رقم ریکور کرنے کیلئے معاملہ مناسب سطح پر اٹھانے کی سفارش کی گئی ہے۔
