اسلام آباد:فیلڈ مارشل عاصم منیر کا کہنا ہے کہ بھارت کو ایٹمی ریاست کے خلاف اشتعال انگیزی کے ممکنہ تباہ کن نتائج کا ادراک نہیں۔کسی بھی مہم جوئی کا بغیر کسی ہچکچکاہٹ کے فوری اور منہ توڑجواب دیا جائے گا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے نیشنل ڈیفنس یونیورسٹی اسلام آباد کا دورہ کیا جہاں انہوں نے نیشنل سیکورٹی اینڈ وار کورس کرنے والے مسلح افواج کے فارغ التحصیل افسران سے خطاب کیا۔ شرکاء سے خطاب کے دوران فیلڈ مارشل نے جنگ کے بدلتے ہوئے کردار پر روشنی ڈالی۔
ترجمان پاک فوج کے مطابق اپنے خطاب میں آرمی چیف نے سول اور ملٹری اداروں کے مابین ہم آہنگی، چیلنجز سے نمٹنے کیلئے ذہنی تیاری، فہم اورادارہ جاتی پیشہ ورانہ مہارت کی اہمیت کو فروغ دینے کی ضرورت پر زوردیا۔
فیلڈ مارشل نے نیشنل ڈیفنس یونیورسٹی جیسے اہم اداروں کے کردار کو سراہا۔آرمی چیف نے کہا کہ بھارت کی جانب سے آپریشن سندور میں ناکامی کی غیرمنطقی توجیہات پیش کی جارہی ہیں، توجیحات پیش کرنا بھارت کی آپریشنل تیاری،اسٹریٹجک دوراندیشی کی کمی کا ثبوت ہے، بھارت پاکستان کی حکمت عملی، مقامی صلاحیت اور کامیابی کو تسلیم کرنے سے گریزاں ہے۔
فیلڈ مارشل نے کہا کہ بھارت نے اقوام عالم میں ہمیشہ خود غرضانہ اور تنگ نظری کا مظاہرہ کیا جبکہ پاکستان نے اقوام عالم میں اصولی سفارتکاری پرمبنی دیرپا شراکت داری، باہمی احترام پر تعلقات قائم کیے، پاکستان نے خود کو خطے میں نیٹ ریجنل اسٹیبلائزر ثابت کیا ہے۔
آرمی چیف کا کہنا تھا کہ بھارت آپریشن سندور کے دوران اپنے مقرر کردہ فوجی اہداف حاصل کرنے میں ناکام رہا، پاکستان کی کامیابی میں بھارت کے بیرونی حمایت جیسے الزامات غیرذمہ دارانہ اور حقائق کے منافی ہیں، ایسے بیانات بھارت کی پاکستان کی کامیابی کوتسلیم کرنے میں روایتی ہچکچاہٹ کی عکاسی کرتے ہیں۔
شرکاء سے خطاب کے دوران فیلڈ مارشل نے مزید کہا کہ دوطرفہ فوجی تصادم میں دیگر ملکوں کو شامل کرنا بھارت کی ناقص سیاسی کوشش ہے، بھارت کے بے بنیاد بیانات کا مقصد خطے میں فرضی نیٹ سیکورٹی پرووائڈر کے خود ساختہ رول کی ناکام کوشش ہے، وہ بھی ایسے وقت میں جب خطے کے ممالک بھارت کی جارحانہ اور ہندوتوا نظریے سے تنگ ہیں۔
آرمی چیف کا کہنا تھا کہ پاکستان کی خودمختاری، سالمیت کو نقصان پہنچانے کی کوشش برداشت نہیں کی جائے گی، کسی بھی مہم جوئی کا بغیر کسی ہچکچکاہٹ کے فوری اور منہ توڑجواب دیا جائے گا، شہریوں، فوجی تنصیبات، اقتصادی مراکزاوربندرگاہوں کونشانہ بنانے کی کسی بھی کوشش کا بھرپور جواب دیاجائے گا۔
پاکستان کا جواب دشمن کی سوچ سے بڑھ کر زیادہ سخت اور مؤثر ہوگا۔فیلڈ مارشل نے کہا کہ بھارت کو ایٹمی ریاست کے خلاف اشتعال انگیزی کے ممکنہ تباہ کن نتائج کا ادراک نہیں، کسی بھی کشیدگی کااصل ذمہ دار بصیرت سے محروم، مغرورجارح بھارت ہوگا۔
جنگیں میڈیا کی بڑھکوں، درآمدشدہ مہنگے جنگی آلات یا سیاسی نعروں سے نہیں جیتی جاتیں، جنگیں یقین محکم، پیشہ ورانہ قابلیت، آپریشنل شفافیت، قومی عزم وحوصلے کے ذریعے جیتی جاتی ہیں۔
