پاک چین مذاکرات مکمل: اسٹریٹجک پارٹنرشپ مزید مضبوط بنانے کا عزم

بیجنگ :پاکستان اور چین کے درمیان باضابطہ مذاکرات مکمل ہوگئے، وزیرخارجہ اسحاق ڈار اور چینی ہم منصب وانگ یی نے اپنے اپنے وفد کی قیادت کی۔ پاکستان اور چین کے درمیان اعلیٰ سطحی باضابطہ مذاکرات اختتام پذیر ہوگئے، جن میں دونوں ممالک نے اسٹرٹیجک شراکت داری کا جائزہ لیا اور اسے مزید مضبوط بنانے پر اتفاق کیا۔
مذاکرات میں پاکستان کی جانب سے نائب وزیراعظم اسحاق ڈار نے وفد کی قیادت کی جبکہ پاکستانی سفیر خلیل ہاشمی اور ایڈیشنل فارن سیکرٹری عمران صدیقی بھی وفد میں شامل تھے جبکہ چینی وفد کی قیادت وزیر خارجہ وانگ یی نے کی۔ ذرائع کے مطابق مذاکرات میں پاک چین اسٹرٹیجک پارٹنرشپ، علاقائی صورتحال، اور باہمی دلچسپی کے امور زیر غور آئے۔
نائب وزیراعظم اسحاق ڈار نے بھارت کے ساتھ حالیہ کشیدگی پر چین کو آگاہ کیا اور بھارت کے ”جھوٹے بیانیے” کو مسترد کیا۔دونوں ممالک نے اس بات پر زور دیا کہ پاکستان اور چین کے درمیان اعتماد اور تعاون پر مبنی شراکت داری خطے میں امن و استحکام کے لیے اہم ہے۔
ملاقات کے اختتام پر چینی وزیر خارجہ وانگ یی نے پاکستانی وفد کے اعزاز میں عشائیہ بھی دیا۔نجی ٹی وی کے مطابق بیجنگ میں ہونے والی ملاقات میں نائب وزیراعظم اسحاق ڈار اور کمیونسٹ پارٹی کے وزیر یو جیان چاؤ نے سیاسی جماعتوں کے درمیان روابط مزید مضبوط بنانے پراتفاق کیا۔
چینی وزیر سے ملاقات میں اسحاق ڈار نے پاکستان کی خودمختاری اور بنیادی مفادات پر چین کی حمایت کو سراہا۔اس موقع پر یو جیان چاؤ نے کہا کہ چین پاکستان کا آئرن برادر ہے اور پاکستان سے تعلقات کو ترجیح دیں گے۔