کراچی: گڈز ٹرانسپورٹرز نے 3 روز سے جاری ہڑتال ختم کرنیکا اعلان کردیا، جس کے بعد کراچی پورٹ، پورٹ قاسم اور دیگر کنٹینرز ٹرمینلز پر کام شروع ہوگیا۔گڈز ٹرانسپورٹرز نے سندھ حکومت سے کامیاب مذاکرات کے بعد ہڑتال ختم کرنے کا اعلان کیا ہے جس کے بعد بندر گاہوں پر کارگو کلیئرنس اور لوڈنگ ان لوڈنگ بحال ہوگئی۔
ٹرانسپورٹ گڈز ایسوسی ایشن کے صدر نے کہا کہ ٹرانسپورٹرز، حکومت شہر میں حادثات کی روک تھام چاہتے ہیں، 50 سال کے مسائل ایک دن میں حل نہیں ہوسکتے اور 15 ہزار گاڑیوں کی فوری اپ گریڈیشن ممکن نہیں۔
انہوں نے کہا کہ اپ گریڈیشن کیلئے وقت کا مطالبہ تھا، حکومت نے پکڑی گئی گاڑیاں چھوڑنے کی یقین دہانی کرائی ہے اور ہم ہر ہفتے اپ گریڈڈ گاڑیوں کی رپورٹ حکومت کو دیں گے۔ادھرگڈز ٹرانسپورٹرز کی ہڑتال سے چاول کی ملکی برآمدات بھی متاثر ہو گئی۔
مجموعی طور پر 2 کروڑ ڈالر سے زائد کا چاول پاکستان سے برآمد نہیں کیا جا سکا، جبکہ آلو، پیاز، پلپ اور جوسز کے 100 سے زائد کنٹینرز کی ترسیل بھی رکی ہوئی ہے۔پاکستان فروٹ اینڈ ویجی ٹیبل ایکسپورٹرز ایسوسی ایشن کے سرپرستِ اعلیٰ وحید احمد کے مطابق گڈز ٹرانسپورٹ کی ہڑتال سے برآمدی شعبہ متاثر ہو ا ہے۔ آلو، پیاز سمیت جلد تلف ہو جانے والی اشیاء کے کنسائمنٹس کی ترسیل متاثر ہو ئی ہے۔
انہوں نے کہا کہ 100 سے زائد کنٹینرز کی بندرگاہوں کو ترسیل رک گئی ہے۔ آلو اور پیاز کے علاوہ پلپ اور جوسز کے کنسائمنٹس کی بندرگاہوں کو ترسیل رک گئی ہے۔
