کراچی کے پوش علاقے ڈیفنس خیابان اتحاد میں واقع غیرملکی فوڈ چین پر مشتعل افراد نے حملہ کر دیا۔ درجنوں مشتعل افراد نے ریسٹورنٹ پر پتھراؤ کیا اور نعرے بازی کرتے رہے۔
مشتعل افراد نے فوڈ شاپ کے باہر گاڑیوں کو بھی نقصان پہنچایا۔ ایس ایس پی ساؤتھ کا کہنا ہے کہ مشتعل افراد نے فوڈشاپ میں توڑ پھوڑ کی اور گیٹ کا شیشہ توڑا گیا، اطلاع ملنے پر پولیس موقع پر پہنچی اور توڑ پھوڑ میں ملوث متعدد افراد کو حراست میں لے لیا۔
ایک شخص کو ہتھوڑے سمیت حراست میں لیا گیا ہے جب کہ پولیس کی اضافی نفری تعینات کر دی گئی ہے اور صورتحال کنٹرول میں ہے۔
پولیس کا بتانا ہے کہ توڑ پھوڑ کے واقعات نیشنل اسٹیڈیم کے قریب،محمد علی کالونی اور بہادر آباد چار مینار چورنگی پر بھی پیش آئے۔شہر میں حملوں کی اطلاعات پر پولیس کو پہلے ہی آگاہ کر دیا گیا تھا تاکہ کوئی ناخوشگوار واقعہ پیش نہ آ ئے۔
