کراچی میں میٹرک امتحانات کل سے شروع، 499 مراکز قائم

کراچی : شہر قائد میں میٹرک کے امتحانات کا آغاز کل سے ہوگا، چیئرمین بورڈ کا کہنا ہے کہ امتحانی مراکزمیں کسی بھی قسم کی ڈیوائس یا موبائل فون ضبط کرلیا جائے گا۔
چیئرمین ثانوی تعلیمی بورڈ غلام حسین سوہو کی جانب سے کہا گیا ہے کہ کراچی میں نویں، دسویں جماعت کے سالانہ امتحانات کل سے شروع ہوں گے، نہم ودہم جماعت کے امتحانات کیلئے 499 امتحانی مراکز قائم کیے گئے ہیں۔ چیئرمین بورڈ کا کہنا تھا کہ ریگولر طلبہ و طالبات کو ایڈمٹ کارڈ پورٹل پر آن لائن جاری کیے گئے اور امتحانی مراکزکی لسٹ بھی بورڈکی آفیشل ویب سائٹ پرجاری کی گئی ہے۔
انھوں نے بتایا کہ میٹرک کے امتحانات میں 3 لاکھ 75 ہزار طلبہ و طالبات سائنس وجنرل گروپ کے امتحانات دیں گے ، امتحانی مراکز پر بورڈ کے آفیسرز امتحانی پرچوں کی ترسیل پر مامور ہوں گے۔ غلام حسین سوہو نے طلبہ کو خبردار کیا کہ امتحانی مراکزمیں کسی بھی قسم کی ڈیوائس یا موبائل فون ضبط کرلیا جائے گا۔
ان کا مزید کہنا تھا کہ امتحانی مراکز اطراف میں فوٹواسٹیٹ کی مشینیں دوران امتحان بندرہیں گی اور امتحانات کی نگرانی کیلئے بورڈ آفس میں رپورٹنگ سیل قائم کیا جائے گا۔