ایم کیو ایم کی کوششوں سے بجلی سستی ہوئی، فاروق ستار

کراچی : متحدہ قومی موومنٹ پاکستان کے رہنما ڈاکٹر فاروق ستار نے وزیر اعظم کی جانب سے بجلی کی قیمتوں میں ریلیف دینے کو خوش آئند قراردیتے ہوے کہا ہے کہ ایم کیو ایم کی کوششوں سے بجلی کی قیمت میں کمی ہوئی، مزید 6 روپے کم کروائیں گے، بجلی کی قیمت میں مزید 6 روپے کمی کی گنجائش ہے اور امید ہے کہ کراچی جلسے کے دوران قیمتوں میںمزید کمی کا اعلان کرانے میں کامیاب ہوجائیں گے۔
پریس کانفرنس کرتے ہوئے انہوں نے کہا کہ گزشتہ روز وزیراعظم پاکستان نے بجلی کی قیمتوں میں مناسب کمی کا اعلان کیا، یہ کمی مختلف قسم کے صارفین کے لیے 12 سے 17 فیصد ہے، یہ ایک بڑی سہولت ہے جو موجودہ حکومت نے دی ہے۔ انہوں نے کہا ایم کیو ایم نے اس مخلوط حکومت میں شامل ہوکر دو باتوں پر توجہ مرکوز رکھی ایک یہ کہ کس طرح ہم عوام کے لیے بجلی کے بلوں کو کم اور دوسرا پانی کے مسائل کو حل کریں، ان دونوں معاملات میں ایم کیو ایم کا بڑا کردار ہے۔
انہوں نے کہا کہ ہم نے یہ وعدہ کیا تھا کہ عید کے بعد بجلی کی قیمتوں میں 5 سے 10 روپے کمی آئے گی، کل تاجر اور صنعتکاروں کی جانب سے شکریہ کے فون آئے، کسی کا بل 10 ہزار آرہا ہے تو اب 8 ہزار 500 آئے گا۔ انہوں نے کہا کہ وزیراعظم نے عید کے بعد کراچی آنے اور ایم کیو ایم کے جلسے سے خطاب کرنے کی حامی بھری ہے، امید ہے کہ وزیر اعظم سے کراچی جلسے میں بجلی کی قیمت مزید 6 روپے کم کرانے میں کامیاب ہوجائیں گے۔
انہوں نے کہا امید ہے اگلے بجٹ میں شرح سود 12 سے کم ہو کر 9 فیصد تک آئے گی، لوگوں کو آسان قرضے مل سکیں گے، یہ ایک سال کے عرصے میں ایک نمایاں پیش رفت ہوئی ہے تاہم اس کا اثر نچلی سطح پر فوری طور پر نہیں آئے گا۔ انہوںنے کہا کہ بجلی سستی ہونے سے صنعت ترقی کرے گی، عام تجارت اور کاروبار کو فائدہ ہو گا، اس کمی میں ایم کیو ایم کا نمایاں کردار ہے۔